青春可否不要老？細數膠面藝人

想自己個樣保持年輕當然係每個人嘅夢想，但好多人為咗防腐下咗唔少功夫，最後卻變成膠面人，得不償失。

近日陳曉東嚟香港拍攝廣告，闊別香港十年嘅佢一直都喺內地積極搵人仔，十年後再現香港，雖然皮膚完美無瑕，一對大眼都仲喺到，但就被一眾網民話佢膠面，懷疑佢塊面膠到做唔到表情。曾經喺青春偶像嘅陳曉東，因為五官清秀加上可愛爆牙，迷倒勁多女仔。現年45歲嘅佢為保青春，雙眼皮越割越深，爆牙都冇埋，塊面仲非常生硬，好唔自然。唔怪之得網民起勢咁話以前嘅陳曉東更加靚仔啦！

想越變越後生但招致反效果嘅又點止陳曉東一個？

鄭裕玲

一向身材苗條嘅鄭裕玲（Do姐），一直都追尋凍齡嘅方法。當年佢同呂方分手後，因為情傷而體重暴跌，瘦到不似人形。但愛美嘅Do姐好快恢復狀態，唔單止日日晨跑keep fit，更加勇敢承認自己打果酸換膚同埋去斑，仲日日做facial，希望自己嘅皮膚好似BB一樣咁又白又滑。雖然Do姐成功令皮膚保持青春，但有唔少人都覺得佢太重手，塊面皮越換越薄之餘，五官仲有留有唔少整容嘅痕跡，同已故樂壇巨星米高積遜（Michael Jackson）有幾分相似，所以被網民封為「女版MJ」。

葉翠翠

最近升呢做人妻嘅葉翠翠，容光煥發，完全係幸福樣！但其實佢當初成為選美冠軍嘅時候，因為五官平平而令人覺得佢未夠班做港姐，但翠翠後來越變越靚，所以引起整容疑雲。翠翠出道初期喺單眼皮、扁鼻同埋闊面，但後來個鼻變得又高又直，而且塊面都變細埋，真係今非昔比。進化到後期，翠翠塊面更加緊緻到一條紋都冇，非常白滑，當時網民仲笑言佢塊面十足十蠟像咁，又膠又硬。雖然翠翠一直都否認自己整容，但睇返啲相，又真係好難令人相信喎。

劉愷威

自從北上拍劇之後就爆紅嘅劉愷威，同樣被指整容。佢一出道就喺無線拍劇，當時佢個樣非常青澀。後來轉戰內地之後，形象同個樣都開始改變，對眼大咗之餘，塊面仲尖咗好多，最明顯就係個鼻高咗唔少，所以即使佢宜家已經42歲，但望落依然好後生。但與此同時，有好多香港同內地網民覺得佢塊面非常唔自然，話佢拍戲嘅時候塊面硬到冇晒表情，又皺唔到眉，好唔自然。

圖片來源：陳曉東@微博、劉愷威@微博、鄭裕玲@Instagram、葉翠翠@微博