港女講日
港女講日：男人揸車女人切忌多多聲！激嬲柴可夫的3件事
好多男人就算平時脾氣有幾好，揸起車上嚟可以即刻性情大變，直頭變咗另一個人咁！其實女人又知唔知，可能就係因為你而令到另一半又忟又燥兼爆哂粗呢？根據上月日本Honda Access訪問咗1,000對夫婦嘅最新調查，得出3個當男人揸車女人坐前排時，兩人最易鬧交嘅原因，各位情侶/夫妻想出門玩得開開心心唔想掃興，記得要留意呀!
1. 質疑對方唔識路
女人最怕男人唔識路，而男人最怕就係揸緊車嘅時候畀人指指點點，當佢已經好集中精神專心搵路時，你仲要加把口用啲唔耐煩嘅語氣講「唔係呢條路啦」、「你係咪行錯?」等，男人會覺得好煩同埋冇面！
2. 塞車時唔出聲
係人都唔想塞車架啦，但萬一真係唔好彩遇著塞車，記住唔好全程粒聲唔出，男人可能會諗你係咪怪佢冇check好交通情況而行咗條塞車嘅路，所以嬲到唔講嘢；女人又可能以為佢咃因為塞車而覺得唔耐煩而黑面，大家都估估吓唔知對方諗咩，萬一其中一方忍唔住爆句：「有咩唔滿意咪出聲囉……」場交就係咁開始拗!
3. 控制男人點揸車
男人天生對機械操作係比女人有啲優勢，所以揸車技術係其中一樣可以喺女人面前認叻嘅事，但係如果你喺側邊指指點點:「綠燈喇仲唔開車」、「剎車剎得咁急架」、「開快啲啦」等等，直頭係落緊佢哋面啦，如果你仲係唔識收口繼續多多聲，小心佢一腳踢你落車呀!
