港女講日：治安差地震多！日本人票選5大最唔想住日本地方

大部分港人都當日本係第2個鄉下，一年去幾次唔出奇。點知最近睇到日本雜誌《実話BUNKAタブー》一篇「死都唔住!最差嘅都道府縣排行榜…」，原來港女幾個常去嘅旅遊熱點都唔係日本人理想居住地，甚至誇張到話寧願死都唔想住喺京都、大阪、沖繩等地，究竟點解呢?

第五位 静岡縣
位於東京及京都中間嘅静岡縣，有港女必影必打卡嘅富士山美景，住喺呢度應該好開心啩?可惜鄰近地震發生帶嘅南海海槽，日本地震專家警告未來30年南海海槽必會發生大地震，靜岡縣會係最重災區，你話命仔緊要定富士山風景緊要啲?

第四位 京都府
全日本公認最難相處就係京都人，自尊心重、講嘢口不對心、又會鄙視大阪、神戶等其他關西地區嘅人，最重要係成條街都有著和服影緊相嘅港女，又真係幾唔適合人住。

第三位 高知縣
呢排有平機票去四國，高知亦都多咗港人去。其實高知交通好唔方便，四圍都係高山，如果由瀬戶內海揸車去必經險峻山區，手車唔掂都唔好去！另外落雪及���風機會多，人均收入低都係死因！

第二位 大阪府
周街都可以搵到下流賤格、狂講粗口、污糟邋遢嘅中年大叔，犯罪率及貧困率都係全國數一數二，日本人都嫌大阪治安差、小朋友唔適宜住怕學壞等，港女們去大阪要小心人生安全啦！

第一位 沖繩縣
沖繩陽光與海灘咁吸引，日本人居然覺得呢個地方好差！原來沖繩人會用「ナイチャー」稱呼外來人(類似我哋嘅「大陸佬」意思) ，而且因為係美軍基地，當地有唔少反日左翼人士，貧困率更係全國第一，仲有唔少女中學生賣淫，加上經常有颱風，喺呢度住應該好惡頂，小心抑鬱！

資料來源
http://imgur.com/a/kI6vA
圖片來源
tumblr@asian-folk-wardrobe