情人節好戲推介 5套實唔中伏電影
今年情人節係星期二，對於男士嚟講可以話鬆一口氣，因為僅需要安排放工之後嘅活動。而最唔使用腦當然首推睇戲啦！雖然好似無乜Effort，不過要揀啱一套好戲一啲都唔易架，又要啱自己女友，又要有Mood，唔通你想情人節去睇《德州電鋸殺人狂》咩？所以一套啱睇嘅電影，即刻可以將浪漫氣氛升溫，完美呀。即刻同大家介紹幾套情人節上畫嘅電影，留意返喇。
《星聲夢裡人》：（懶）有深度之選
橫掃金球獎7項大獎，引起影壇哄動，一時間，睇《星》片變成潮流，社交網站上人人都話要睇。電影以歌舞片形式，講述兩位星途失意嘅人如何走在一起，既勵志又不落俗套，而且講到追夢同現實之間嘅掙扎，啱晒香港年輕人睇喇，尤其兩口子睇完出嚟，又未有樓一齊住，要周圍搵地方聚，係咪更加身同感受先？
《西遊伏妖篇》：星爺粉絲之選
好多情侶都會用星爺經典對白打情罵俏，更甚者甚至可以互相背誦星爺對白，係咪好鬼有情趣呢？如果你係呢種情侶，今年情人節又有星爺監製嘅《西遊伏妖篇》，繼續無厘頭搞鬼之餘亦有星爺《西遊記》系列嘅愛情玄機於當中，就盧冠廷首《一生所愛》已經感動幾億人。
《格雷的五十道色戒2》：興烚烚之選
唔使多介紹啦，充滿視覺上嘅刺激，又講色暴力又講暴飢渴，簡直係比上一集更大尺度！最緊要係情人節睇，大家隨時慾火焚身，雖然即時搵地方解決需要。（我意思指食飯，唔好諗多。）所以保証睇完呢套戲有下場，買一送一，諗一個節目，送下一個節目。
《LEGO蝙蝠俠英雄傳》：童心之選
比起上面一套，呢套簡直係清泉。LEGO大人細路、男女老幼通殺，基本上穩打穩扎，建議啱啱拍拖無耐嘅朋友可以選擇，一方面令對方對自己有個好印象，另一方面呢種笑片絕對輕鬆，可以提供無限話題，睇完之後大把嘢講。當然，如果拍拖已久嘅朋友一樣可以輕鬆過一晚嘅。
《生化危機：終極屍殺》：非份之選
嘩，情人節喎，又屍殺又血又暴力唔係咁好喎！話明「生化危機」，有危即係有機呀，睇恐怖片，從來都係加速二人接觸嘅催化劑，做女仔嘅就算唔驚都要扮到好驚驚，再一嘢攬落男仔到；作為男仔就梗係要大刺刺坐喺座位度，再一手攬實女生做保護狀。至於套戲入面啲肝呀潤呀心呀飛晒出嚟？咪鬼理佢啦！
