Long weekend去邊好？ 白兔、貓貓、鸚鵡陪你過中秋
開學已經個幾星期，大人細路各有各忙，難得今年中秋貼住禮拜六日，連放３日假long weekend！傳統故仔就話有玉兔陪你食月餅過中秋，現實原來都搵到！今次找來3間有動物「駐守」的食店，一間有萌爆兔BB、一間有貓星人周圍走、一間更有好少見的大鸚鵡！陪你趁中秋鬆一鬆~
Café共有12隻白兔，店員會每隔一陣就放一隻出來周圍走 (其餘的兔仔都關在圍欄/籠內)，所以入到café進用餐區前要先除鞋(亦規定一定要著襪)！亦要放輕腳步，小心唔好踢到佢哋呀。(影相亦唔好用閃光燈，總之各位愛惜兔仔，自律啦)
12隻白兔有男有女，有老有嫩。至於店長？就係佢 —— 名叫「麵包」的兔囝囝，聽cafe老闆講，因為佢夠活躍，客人最鍾意。
想餵兔仔，可以用café提供的兔仔小食 (連套餐有送，另可加錢買)。
溫馨提示，想兔仔企定地俾你影靚相，糧草是必需的。
藍莓芝士餅 $98(已包1小時入場)。Menu有小食(沙律/飛碟/餃子/雞翼)也有飽肚的意粉/烏冬，這cheese cake軟綿夠滑，芝士味幾香。
綠茶紅豆飛碟 $98。普通飛碟都交足貨，綠茶紅豆餡足料，不太甜，如果茶味再濃一點就更好。
吉列豬扒麻醬冷烏冬 $138。吉列豬扒有驚喜，外脆肉腍；麻醬調得不錯，幾秒KO整碟烏冬，好味！
(左起)雜果賓治、黑糖薑母茶。推介黑糖薑母茶，暖笠笠薑味溫和，飲完喉嚨好舒服。
>>>>>>Rabbitland Cafe
地址：銅鑼灣謝斐道530號3樓 (5281 0280)
*建議先預約
Café位於荃灣，說得上是香港第一代貓café，地方也是數一數二的大。上來的「貓奴」，邊食邊飲邊影邊玩貓。
加分位是café有充足日光，影靚相更容易。
全店住了30隻貓星人！隻隻都有名有姓，大部份都是店主領養回來。
想試下「俾貓圍」?可以即場買貓糧，不過每小時只限3個名額。
Café有自己守則，例如貓貓睡覺/ 進食飲水時請別抱起。
白桃酸車厘子慕絲蛋糕 $22。Menu內都是輕食為主，除了香口小食。這裡的cheesecake及幾蛋糕都不錯。
玫瑰石榴紅茶 $20、曲奇$6/2塊。紅茶雖不算名貴貨色，茶香頗濃，最啱襯曲奇食。
魚手指 $30/8件。脆卜卜，上枱夠熱，醬汁酸酸甜甜好香口。
日式和風熱狗 $28、大薯條 $30。蛋沙律、木魚加熱狗腸，簡單好吃；大薯條份量好慷慨，抵食！
豬肉烤卷 $48。烤卷不算特別，勝在可以揀千島/ 沙律/ 蕃茄/ 芥末/ 辣汁/ 麻辣做醬汁。
意式魚柳蜆肉意粉 $42。Café也有意粉/飯/烏冬等飽肚食物，陪女友上來的男朋友們唔怕餓親。
>>>>>>貓之茶房
地址：荃灣大河道45號樹勳樓1樓 (2149 6261)
*建議先預約
這間於葵涌新開的西餐廳，老闆和老闆娘都是愛雀之人，在家養了約10隻鸚鵡，閒時(視乎天氣)會帶埋2隻鸚鵡來曬曬太陽，同客人影下selfie都得。餐廳英文名’Electus’正是「折衷鸚鵡」咁解。(溫馨提示：餐廳位置不易找，建議在「業成街」找東聯工業大廈，旁邊有路上)
留意返，看門口的2隻鸚鵡不會整天駐場，想睇？老闆話每日大概11am-3pm及5pm就最有機會出現，不過如果天陰陰，落大雨，就無緣相見啦，怕鸚鵡淋雨會病。
2隻靚靚鸚鵡，分別係鮮綠色的Jasper(男)，鮮紅色的Ruby(女)，約一歲，算是鸚鵡BB。
店主話，如果鸚鵡對住你不停叫，其實係佢鍾意你，對你唱歌！
The Full English Breakfast $95(lunch menu)。餐廳吃的是大路西餐，意粉/ pizza/漢堡包/烤肉/沙律。Lunch menu最抵食，像這個份量的fill English breakfast，連飲品及沙律/餐湯，一百蚊有找，抵食！
Pizza for two + Coffee for two $110。約6吋大的pizza，芝士/肉腸/黃椒好足料，上枱時香噴噴勁惹味，如果可以減點油膩就更好
Baby Back Ribs $90 (lunch menu)。牛肋骨燒得香口，皮肉一咬即分開。BBQ汁是店自家製，帶少少酒香。伴碟的厚切薯角也不馬虎，炸得香脆好吃。
US Roasted Spring Chicken $89。半隻燒春雞，皮薄薄的，燒至焦香，燒得剛好留有肉汁且滑。
餐廳設室外及室內area，座位都闊落，好啱一家大細。
>>>>>>The Eclectus鸚國
地址：葵涌青山公路葵涌段313號天際中心地下 (3165 1501)
*鸚鵡出沒時間：11am – 3pm，約5pm，視乎天氣而定
