Job Rotation

如果大家既老闆同你講'Job Rotation'，大家會點呢?好開心?因為覺得隔離同事啲野總係易做啲咁?會好唔開心?因為自己啲野跟得好好地，唔想放比人?或者大家睇完下面既故事會有所感受。

同事A﹕「大哥，你啲野可唔可以做得整齊啲，唔好要我成日幫你執手尾呀!」
同事B﹕「你估我啲野好似你咁易做咩，你啲野咪又係亂咁黎。」

就係咁，兩位同事噪到拆哂天，結果老闆搞個Job Rotate，全部人既JD大反轉，就連愁愁都不能倖免於難，被逼接左個傳聞中最惡搞既客，同最難頂既JD。其實愁愁真係唔介意做，但可唔可以安排得好少少呢?話說個個客既系統都唔同，都要啲時間學，話轉就轉，連Pick Up既時間都冇，點學呀，所以呢排番工番到噪哂底。

最搞鬼既係同事A同同事B既JD剛好調轉，成日都話人地啲野好易做，而家就搞出個大頭佛。同事A唔肯教同事B，同事B唔肯教同事A，結果兩個一齊比客投訴，搞到一齊比老闆鬧，愁愁真心覺得早知今日，又何必當初呢?講真，每個客都唔易服侍，每個人都有唔同專長，可能同事A做啲野係有時會錯，但佢治到個客聽哂佢話﹔可能同事B做啲野有時會亂，但佢啲野其實冇錯。

愁愁同班同事，比呢兩位郁啲就投訴既同事搞到就快死，日日做到冇停手，凡事包容啲啦，唔好郁啲就話同事做野唔得，唔好郁啲就同老闆投訴。因為你害到既唔係得你投訴果個人，係會害到全公司既人。出黎做野，對同事既時間隨時多過對住屋企人，又何必搞到公司好似戰場咁呢?開開心心又一DAY咪幾好，正所謂「退一步海闊天空，忍一時風平浪靜。」

各位打工仔，愁愁響度奉勸大家凡事忍下，唔好為左宣洩自己一時不滿而累到其他人，唔單止番工，做人都係架，忍下啦。'忍'呢個字，好多人學一世都學唔到呀。

Facebook/Tumblr: behappysadness