Gentleman同抽水只係一線之差？

「喂，上次同個男仔出去點呀？有無下文？」Brenda說。
「無啦，第一次出街佢已經係咁掂我，過馬路用手「磅」住我都算，我當人多，但係明明商場得幾丁友，佢都係咁捉住我隻手叫我小心啲，我覺得好唔舒服。」同事Kate說。
「咁佢又誇啲，不過你有無嗌唔好先？」Brenda說。
「無呀，我怕講出嚟搞到大家好尷尬吖嘛。」Kate說。
「吓，你唔講人地唔知㗎喎，分分鐘仲以為你enjoy！」Brenda說。

其實日常生活中男女之間少不免會有啲身體接觸，如果大家已經好熟，friend過打band，當然無乜所謂啦，亦唔會諗佢究竟係咪想抽水，但當一個唔熟嘅朋友，甚至係陌生人，可能掂到你條頭髮咁大把你都覺得佢擺明係想抽水，實行啤到佢實一實。其實遇到以上情況，Kate小姐大可轉用麻甩tone：「喂，我自己行得啦，仲細咩！」起碼畀男方知道你唔鍾意佢掂你，而唔係笑笑口咁繼續行，令人有所誤會。可惜現實中有啲情況係比較難出聲，例如人哋幫緊你又或者對象係唔得罪得嘅人(老細)。

有次要搬好多手提電腦，個客想幫手搬，但係每搬一次佢就掂我隻手一次，雖然我話：「自己嚟得喇！」但係佢都堅持要幫手搬晒佢，咁可以點？可能你會話人哋好心幫你你仲話人抽水！你信唔信都好，女人係有種直覺，感覺到嗰個人究竟係想幫手、唔小心定堅抽水，當然無話一定準確，但只要有一種「唔舒服」嘅感覺出現，女人嘅戒心就會自自然提高。

最慘係以前有個老細，每次我拎文件比佢佢都會掂我隻手，就算我拎到張紙嘅邊邊，佢都有辦法掂到，仲會話：「嘩，你隻手咁凍嘅！」我心諗：「凍你條命，關你叉事呀！」不過通常我都好唔爭氣，只係會話：「冷氣凍掛/ 我冷血/ 不嬲都凍。」佢亦都成日搭女同事膊頭，好彩我生得高，所以佢無搭過我，當然，我都好快就脫離咗呢間公司。

其實以我觀察，女仔對同其他男人嘅身體接觸其實都係無乜戒心，通常都會話：「唓，我哋不嬲都好friend，無嘢嘅！」又或者話：「佢都係唔小心啫！」即使覺得「唔舒服」都未必會出聲，因為怕尷尬，反而男友對女友同其他男人嘅身體接觸就好大戒心喇！例如我行街無啦啦比人撞到，我男友就俗稱呢個行為係：「比人抽完水仲要同人講對唔住！」不過究竟人哋係有心定無意？老老實實有時我真係傻傻分不清楚，然後我男友只丟下一句：「從來只有男人明男人諗咩，你哋啲女人咁天真係唔會明㗎喇！」

Facebook Page：littlevibrantgirl
Tumblr Blog：littlevibrantgirl