九州增肥遊(థฺˇ౪ˇథ) Ｄay 1 福岡 – 超平和服體驗

我嘅8日九州之旅由福岡開始 ！搭HKEXPRESS去福岡大約五點到，之後就去酒店放低行李。雖然間酒店幾遠，最少行15分鐘先到，但真係值得推介！！！幾百蚊住到五星級質素嘅酒店，間房唔可以話好大，但設計簡約新淨好靚。

但最靚最靚嘅唔係房入面，係出面嘅夜景！

抖吓影吓相就已經9點幾，去到運河城啲舖都差唔多收晒，本身諗住試吓食屋台，但見到選擇唔算多，而且價錢有啲貴，唔太吸引，行行吓揀揀吓就行到去天神，結果落機第一餐，就去咗食一風堂。

或者我比較奇怪，我覺得麻麻地，有少少失望。食完之後經過見到夾公仔店，我又受唔住引誘喇，結果符符碌碌咁用咗400円就帶咗布甸狗返屋企。

第二日一早起身去二日市着和服，4000円就可以由10點着到5點，真係好抵。我記得我之前係京都，貴一倍有多。入到去佢唔畀我影相，所以剩係喺門口影咗一張。

入到去，可以畀你揀嘅款唔多，腰帶果啲仲無得你揀添。不過咁平，其實都抵嘅，何況佢幫你襯得好好睇睇嘅。着完和服之後，就去咗太宰府。

雖然無咩櫻花，但係都好靚。不過着住和服真係有啲凍，即使我着咗防寒內衣都唔掂，得11度又大風。 夜晚就返咗去天神，行到累就隨便行入一間居酒屋就算，雖然張menu完全睇唔明，不過佢一碟300円咁抵，結果隨便嗌就算。無諗過呢間咁好食，即使300円一碟，但全部都好好食呀！！

全部都真係300円，不得了！食完之後真係超滿足，飽到不得了！

想知詳細地址/店鋪介紹可以like番我facebook page :)

Follow me ヾ(○´▽｀○)ノ

Facebook: 港豬生活點滴．
Instagram: flypighk