我真係好掛住屋村嘅人情味

人大咗，放假都鍾意留喺屋企，有住家飯食又有冷氣涼，一樂也。話說星期六喺我食飽飯涼緊冷氣，非常嘆之際，阿媽突然打開咗屋企度門，然後大嗌：「嘩，水浸呀！快啲嚟幫手！」然後我、阿爸同男友就著住拖鞋出去睇吓究竟咩事。出到去只係見到有個看更喺走廊不停用垃圾剷裝地下嘅水，旁邊有個超級大嘅筒已經裝滿六成水，成條走廊都浸滿水，水位大概一至兩吋高。

遠望有家人開咗門，伸個頭出嚟問看更發生咩事，原來係有個租客唔識關水制，於是搞到咁。看更話最驚係電梯入水，壞咗好大劑，唔方便之餘仲要用好多錢維修。嗰家人問完之後就關門大吉，當無事發生過，而我阿媽就諗都唔諗衝入屋拎晒啲布出嚟，擋住啲水等佢唔好滲入電梯度，然後再拎埋屋企啲水筒、垃圾筒出嚟裝水，我哋就不停用布吸水，再喺水筒度扭乾佢，吸水、扭、吸水、扭，其實都幾攰，然後突然間看更彈咗句：「都唔知係咸水定淡水。」我真係呆一呆，大佬我手套都無戴呀！

搞咗唔知幾耐之後看更話佢搞得掂，我哋可以唔使幫手，於是阿爸就返入去睇電視。其實目測個超級大水筒，我諗個看更已經努力咗好耐，滿頭大汗無停過手，如果得佢一個人，我都唔肯定佢係咪真係搞得掂，但係既然佢話唔使幫手，咁我都好衰咁諗住收隊，但係呀媽竟然繼續拎住個地拖好努力咁吸，完全無諗住返入屋企。。。

「喂，快啲幫手吸水啦，吸架電梯呀唔係吸我哋屋企門口呀，架電梯壞咗就慘喇。」媽媽說，我簡直覺得佢頭上有光環，我承認我好自私，只係不停吸自己屋企門口啲水，雖然其他地方嘅水其實都係自自然會湧過嚟。

「媽，點解成層樓得我哋一家人幫手嘅？」我邊吸水邊問，其實我知道問都無用，純粹呻吓。
「你唔好理人啦，幫得就幫吖嘛。」媽媽說。
「咁點解個罪魁禍首唔出嚟收拾殘局？」我問。
「佢間屋已經浸晒喇，有排搞呀，唉。」看更搭嘴說。正當我哋已經清走七成水嘅時候，終於又有一家人發現水浸。

「嘩！搞乜鬼呀咁多水嘅！」女人說。
「有個租客唔識關水制呀，已經盡量清緊啲水。」看更邊裝水邊說。
「唔怪得啦！啲水滲咗入嚟呀！有無搞錯呀！唔使要啦我間屋？」女人說，並「啪」一聲關了門。

其實我真係十萬個好奇，點解會有人見到水浸都唔幫手？我哋喺走廊裝水期間其實係有人行過，但係佢哋都可以當無事發生，我懷疑啲人仲會誤會就係我哋呢家人搞到水浸，唔通住私樓嘅人真係自私啲？諗返起細個住屋村，同隔離鄰舍都好熟，行過見到面一定會打招呼，夏天會打開道門吹風，我成日都同其他小朋友一齊玩，阿媽就鍾意同其他師奶交流煮食心得，有時煮多咗仲會叫我拎畀鄰居食。我可以九成九肯定如果以前屋村水浸一定會全村人一齊幫手。又或者已經唔係住私樓同住公屋嘅關係，係以前嘅人同而家嘅人已經好唔同，變得好冷漠，對所有事視若無睹，真係好可悲。

Facebook Page：littlevibrantgirl
Tumblr Blog：littlevibrantgirl