開學要車仔女返學 老婆堅持換歐洲車

開學日一到，各位家長又要開始漫長嘅奮戰喇！講嘅唔單止係學生學習成績上，而家已經係去到家長鬥地位嘅程度！其中好多家長會直接每朝送仔女返學，而講緊嘅係用私家車，而揸咩車就已經係其中一個戰場！近日有男網民於高X討論區之中，就向網友呻苦，話今年個仔升中一，由於無校巴，老婆決定每朝開車送佢返學，然後再返屋企擺低架車再返工。聽落好辛苦，但老婆肯一力承擔，老公當然無話可說；不過老婆就提出一個條件，就係要換車！

原來兩公婆一直開緊一架日本車，家庭5人車，係普通開咗10年左右嘅二手車；但老婆就話嚟緊讀嘅小學係名校，如果開住呢架車送個仔，怕每朝畀其他家長見到會睇唔起佢哋。老婆就直言「現實就係現實，呢啲牌頭嘅嘢唔慳得」，話要換一架普通歐洲車就可以，不過佢哋計過，起碼要加多20萬；而且未計養車嘅錢亦會增加。考慮到只係每朝送仔仔用，似乎真係唔抵買；不過老婆就唔肯讓步，仲話唔換車就唔送個仔，寧願個仔自己一個坐交通工具返去（唔好忘記個仔得7歲，仲要跨區）。

網民大部分都話老婆太過份，而且如果連一架車都咁緊張，往後就只會有排辛苦，因為要比較嘅事又何止咁少。可能不久將來佢哋要換樓、換衫褲鞋襪等，如果所有嘢都要同其他同學比，又點會可能贏得晒所有人。大家又覺得老婆有無道理呢？