鐵娘子 孫佳君

穿着低胸貼身裙的孫佳君，即使如何搔首弄姿，如何展示不同的誘惑表情，但仍掩蓋不了她眼神中的那份倔強。 畢竟她自○三年淡出娛樂圈後，今天再度回歸，已經是三十九歲有兩名囝囝的單親母親了。只是，從前經歷了那麼多，現在再復出拍戲，不怕令外界諸多揣測，例如經濟有問題嗎？「我唔介意人哋咁諗喎。喂，有邊個出嚟做嘢，唔係為賺錢呢？哈哈哈哈！賺錢係一個好practical嘅嘢，好正常啫，it's not a problem！就算外界話到我好潦倒，我都唔介意㗎！哈哈哈！」 說話期間，她不時的仰首大笑，令我感到有點愕然，皆因從前我不下一次聽傳媒行家說過她愛黑面、蠻有脾氣兼說話頗寸。「吓？真係㗎？我嗰陣時真係有脾氣㗎？」她碌大雙眼反問。「有個好犀利嘅導演話畀我聽，通常比較識演戲嘅演員，都會有啲脾氣、有啲性格，哈哈哈！我嗰陣時可能真係……都有少少脾氣嘅。」寸寸哋？「係㗎！因為我個人比較direct，可能我嚟自新加坡，所以啲人覺得我唔夠圓滑啦！但o依家有咗兩個小朋友呢，我都會包容多啲，有耐性多啲，同埋都要好tough㗎。喂，唔tough會畀佢哋烚㗎喎！哈哈哈哈！不過呢，對住兩個小朋友，真係好攰！我真係要用overwhelming（頂唔順）嚟形容！」說着說着，她皺起了眉頭，作了一個頭痛狀—— 這個tough的女人，只要談到她兩個囝囝（名字她不願公開），查實都有她很可愛的一面。 撰文☆周彩霞 攝影☆蔡豪 化妝☆Omix B 服裝提供☆Ted Baker 場地提供☆The Central Wine 設計☆陳佩珍 廿四小時 對於○三年的突然引退，孫佳君坦言，是因為當時遇到了她以為可以開展人生另一頁的那個他。「嗰陣只係咁啱撞到嗰個人（孩子的父親），咁我就諗：或者我係時候要開始另一個part of my life，即係湊小朋友嗰啲生活，所以我嗰陣真係諗住stop（不再拍戲）！」 接着，她先後誕下了兩名囝囝，過了好幾年當全職母親的日子，最終還是成為了單親媽咪。 「of course，我嗰幾年湊小朋友，係一個開心嘅經歷，係冇㎡嘅。但係我每次睇戲都會諗：如果呢個角色係我做，我會點演呢？我發覺原來我嘅戲癮好大，嗰啲湊小朋友嘅時間，我都忽略咗自己，冇時間去發掘自己嘅興趣，或者屬於自己嘅嘢，I need my life，我要有自己嘅空間囉！我覺得自己嘅self都好緊要！我唔可以日日淨係唱兒歌，讀story book，我真係頂唔順呀！ 「好似我嗰日喺洗手間見到個媽媽幫個小朋友換緊片，我就諗：I'm so glad I never have to do that again！哈哈哈！I'm so glad 我以後唔使再幫人換片囉！I'm so glad！哈哈哈！就好似有日見到自己個小朋友識上洗手間，I'm so glad佢上洗手間識自己清潔，我以後唔使再幫佢清潔一樣！哈哈哈！」說着說着，她笑得很開懷。 兩個兒子現在已分別九歲和五歲，她去年終於「不安於室」。「佢哋都到咗呢個年紀，我覺得都係時間可以出番嚟做嘢，咁啱上年喺一個場合撞到楊生（楊受成），同佢傾開偈，好快就簽咗佢哋（英皇）。I'm so glad I'm still moving on。o依家呢個moment，我覺得自己doing something I like，discover自己、develop自己嘅興趣，唔係淨係湊小朋友，for me，工作同家庭都要有個平衡，so now I'll do more work。」 怪獸家長 要兼顧孩子和工作，查實是個比當全職母親更忙碌的選擇。她皺着眉頭說：「其實做parents都係一個好辛苦嘅路程，成日都好多嘢要忙，個腦要handle好多嘢，我一個人喺香港，父母又已經pass away，又冇屋企人幫手，嗰種壓力同攰法呢，真係唔可以imagine！有時我真係handle唔到，都會匿埋喺房喊㗎！」 但母親這個身份，多少總會有好方面的影響吧！「都有嘅，起碼我o依家會包容多啲、有耐性多啲，同埋repeat多啲囉！因為有啲嘢就算講四、五、六遍，嗰個人（囝囝）都未必會收到㗎！」接着，她不停碎碎唸着：「『喂，着番件褸、着番件褸、着番件褸、着番件褸、着番件褸……』哈哈哈哈！係咁㗎！㗎好大鑊！好救命㗎！」 那麼，兩個兒子算難教嗎？「其實都算OK嘅，都唔算太曳。大嗰個o依家讀緊小四，細佬就讀緊K2，我對佢哋讀書已經冇任何要求，因為我最驚怪獸家長㗎！我有啲怪獸家長friend，一打到嚟：『喂，你有冇聽過開咗個乜嘢新嘅班呀？你快啲去報名，快啲！』嘩！要幾快呀？喂，呢啲朋友真係令我好驚呀！ 「不過呢，佢哋啲功課都好大鑊㗎！o依家成日乜嘢都要親子，喂，日日都要親子，好彩我得兩個啫，嗰啲三、四個，都唔知點親子，嗰啲project根本就唔係小朋友做，而係家長做，天花龍鳳咁，嘩！我真係要喺度反映吓，唔該啲學校唔好畀咁多親子嘢，同埋咁多咁奇怪嘅project呀！我話畀你聽，我o依家係expert做project！哈哈哈哈！我好叻做project㗎！」 天堂地獄 雖然孫佳君現在可繼續過她的戲癮，但孩子，還是要廿四小時操心的。「（開工時）佢哋都會不停咁打電話畀我，細佬有時畀人恰，就會打嚟報寸，阿哥大隻啲，要恰佢就恰佢㗎啦！我每次一返到屋企，佢哋兩個已經會對住你巴啦巴啦，兩個人兩把聲，actually我做完嘢、返到屋企，我想靜一陣間，係冇㗎！『too loud！let me catch my breath，等等呀！等我轁吓氣先！』（裝作轁氣狀）『OK，點？』哈哈哈！同埋啲細路開始大，總會多咗啲古惑嘢，有時會唔聽話，有時會講吓大話，有時又會同老師有啲拗撬，係好吃力㗎，不過，小朋友係rewarding嘅，有時返到屋企，佢哋會畫張畫放喺我張牀度，都好感動嘅。」 問到她兩個囝囝的性格，她即時舉了兩個例。「我個細仔好好笑，好識冧我！我兩個禮拜前剪咗呢個短頭髮返到去，我大仔係咁樣（一個O嘴表情）：『好醜樣！』我話：『喂，nobody ask your opinion！我冇問你好唔好睇！』跟住細佬見到個勢係咁就話：『你個頭好靚呀！』哈哈哈哈哈！好好笑！細佬真係好醒㗎！哈哈哈哈！」說罷，她哈哈大笑了良久。 至於阿哥，「佢成日恰細佬，有時又會激到我死。佢哋兩個因為返church，所以有天堂同地獄嘅concept，有次阿哥激親我，我忍唔住同佢講：『你唔好再激我呀，咁我會就嚟死㗎啦！』佢就話：『你死咗，我都唔想喺度啦！I'll follow you wherever you go！』跟住細佬就指住阿哥話：『如果媽咪死咗呢，媽咪就會去天堂，你去唔到㗎！因為你一定會落地獄！』哈哈哈哈！」說罷，她再次大笑起來。 那照計應該是細佬較黐身吧！「其實兩個都黐我嘅！因為冇人畀佢哋黐啦嘛，哈哈！哥哥上個星期啱啱病，瞓喺牀度病到五顏六色，佢竟然問我：『am I going to die？』哈哈哈哈！好好笑！跟住又到細嗰個病，佢就黐住我話：『媽咪，你記得呀，以後我病，你都要帶我去睇醫生呀！』係咁攬住我，好sweet咁囉！」 幾乎滿晒 回歸幕前，她事前亦有跟兩個孩子交代過。「佢哋都知我係拍戲嘅，都有睇過少少我啲戲，冇乜評語，只係想睇多啲，好好奇。佢哋睇我上獎門人，都睇得好開心㗎，見我贏咗，會拍手掌㗎！哈哈哈！ 「有時佢哋知我去開工，我大仔就會話：『我識演戲㗎！你帶埋我去呀！』跟住細佬又會加把嘴：『好呀！你都帶埋我去呀！我都想演番個角色呀！』哈哈哈！佢哋都唔驚鏡頭，但就未必一定有演戲天份，naturally都有啲表演慾嘅。哈哈哈！」 有工作、有小朋友，若然再添個伴侶，生活可能更美滿吧！「之前都有諗嘅，但o依家我冇諗呢樣嘢好耐！actually, I really don't look！if it happens, it happens；if it doesn't happen, it's perfectly for me！right now, I'm looking to我頭先都講過嘅係enrich 我自己嘅life 同myself。」但兩個精靈、醒目的小朋友，應該也有問吧！「冇喎。好好笑㗎佢哋！佢哋覺得我咁嘅狀態係好正常，唔需要拍拖，哈哈哈哈哈！同埋講真呀，淨係balance work同children，差唔多我成個碟都滿晒啦！自己都冇乜位擺㗎啦！哈哈哈！」 最後，我還是忍不住問了她一個可能不應該問的問題：「有後悔生小朋友嗎？」她即時收起了笑容，頓了頓認真地說：「我諗，我係後悔冇搵一個適合嘅人做呢件事（生小朋友），冇搵一個適合嘅人做佢哋嘅爹哋……嗯，我淨係可以話，呢個係part of my life嘅一個經歷。」今天的她，真的成熟了。 去年她（左二）復出，她跟楊受成（紅圈）一拍即合，成為了英皇電影部門的藝人。 ○三年淡出娛樂圈前，跟李璨琛合演《婚前殺行為》。 孫佳君這些年來努力貼身照顧兩名兒子，圖為年前與其中一名囝囝在跑馬地買外賣。 當年誕下孩子後，她曾有好幾年過着少奶奶般的全職母親生活。 復出後在電影《重口味》演骨妹，戲服不是內衣就是睡衣。她聲言是從影以來，穿得最少衫的一齣電影。 早前她（右二）參與新片《暴瘋語》演出，與鮑起靜（左三）等好戲之人合作。 上《獎門人》當嘉賓，孫佳君說，兩名兒子看得甚投入。 女神是這樣煉成的…… 孫佳君九五年首次參演周星馳的《百變星君》而正式入行，又因為在戲中，她以三點式泳衣亮相，外界即封她為性感女神。 「性感，其實我不嬲都冇問題。我好記得嗰陣時我拍《百變星君》，啲人畀件bikini我，都係要側側膊睇吓我着唔着，跟住我冇任何扭扭擰擰，真係當戲服咁着咗，啲人已經覺得好奇怪：『嘩！點解佢會自動着㗎？』 「may be我係喺新加坡長大，我覺得冇乜嘢，運動服咋嘛，但香港人係咁㗎！哈哈哈！其實我一直都冇話特登要好性感、做女神，我反而唔係一個咁追求靚嘅人，做演員，我唔覺得次次都一定要好靚咁出場囉！ 「啲人話我係性感女神，其實我覺得都只係sex apparel，唔係sexy，因為我冇特登sexy。」 這位性感女神最厲害的是，即使現在已是兩子之母，但三圍數字仍可以keep到34C、24、33！！！ 「做運動囉。我呢兩年都有做gym，做跑步機呀、玩吓啞鈴呀，一日一個鐘，一個星期四日。」至於飲食呢？「我乜嘢都食㗎喎，所以，我諗最主要原因係我屋企有大少同二少追住我，所以你放心喎，返到屋企，我就會即刻瘦！哈哈哈哈！真係追到我瘦，仲一定瘦！哈哈哈哈！」 眾男士們應該要多謝孫佳君兩個囝囝。 今年夏天，她自資推出寫真集，大騷產後仍fit到令人噴血的美好身材。 入行首次參演周星馳的《百變星君》，三點式正式登場，成為經典。