話時話：每個人都總有個斷交好友 你有無盡力挽救？

有無試過同最好嘅朋友因為某啲事而炒大獲，最後仲朋友都無得做？陳山聰同伍詠薇呢對契姐弟曾經friend過打band，不過係2011年懷疑因為陳山聰生日時同伍姑娘講以後唔好再聯絡佢後，辣興咗伍姑娘搞到大家無朋友做斷交6年。不過最近佢地就係東京偶遇最後仲約埋一齊食飯，或者因為旅行心情較輕鬆舒懷，兩人最終都握手和好，仲有貼作狀扮kiss嘅復交相上網，陳山聰更留言話「一吻解千怨」、「䀆在不言中」、「感恩」等等。

好友最後能夠和好如初確係好事，講到底其實都不過係面子作怪。如果想同好友重新和好，畀你又會點做呢？

遠離是非

朋友鬧交之後，身邊少不免會有其他花生友係到閒言閒語、加鹽加醋，搞到件事只會愈黎愈差。如果你見到聽到，禮貌咁叫佢地停止亦都唔好參予其中，否則最後一定會畀你好友知道。

誠心道歉

面子有時真係好難放得低，但如果你真係好珍惜同著緊你嘅朋友，唔想可能因為好小事而失去佢嘅話，誠心道歉又有幾難？即使覺得自己無錯，但主動道個歉總能夠打破隔膜。

給予空間

如果你嘅朋友需要空間嘅話，就唔好密集打擾對方，一於俾空間佢靜下。等件事變淡一陣而大家都冷靜番時，再慢慢聯絡啦。

大方原諒

對方主動向你認錯或者氹番你嘅話，就唔好再扮冷淡、高鬥為難人啦，簡單笑下就好似以前一樣，不過最重要都係從事件中學習，避免再次鬧交影響大家嘅友誼啦。

相片來源：joelshanchung@instagram