話時話：追夢都要有技巧 4件事必須事先準備好

Stephy鄧麗欣曾經係港青排球隊成員，即使做咗藝人之後都無放棄追逐佢嘅排球夢想，於是自資組成Loey球隊參加多場賽事。可惜日前係一場比賽中輸咗，嚟緊仲要降班丙組，因此Stephy都顯得幾失落。而且佢亦都自嘲年紀大，今年已經投放咗太多時間係排球隊上面，比較難同時兼顧演藝事業同打波，所以佢都預告出年都唔會再出賽，但依然會努力保住球隊。

雖然我地每日營營役役咁工作，做一粒微細嘅齒輪，但相信每個人都有自己嘅夢想，唔想就咁做一條咸魚，咁係追夢前你要有咩準備？

目標清晰

身邊嘅人同事可能都會影響到你嘅眼界同思考，令你三心兩意。所以最重要係清楚咁知道自己最想做嘅係乜，搵一個時間靜靜坐低釐清思緒好好諗下自己嘅目標。

審慎規劃

知道自己想做咩之後，就係要規劃自己要點樣做可以令你達到呢個目標。先唔好期望能夠一步登天，除非有父幹，因為永遠都急唔嚟，需要靠一步一步咁累積經驗。

承受壓力

係追逐夢想嘅過程中總會係孤獨，身邊人可能會認為你不切實際、嘲笑你、家人壓力、經濟壓力等。不過你人生係屬於你自己做自己想做嘅事、追逐夢想又有何不妥？

無悔結果

人生短暫而無常，無人知道聽日會發生咩事，即使你嘅計劃或者夢想最終失敗咗都唔緊要，因為你至少嘗試過，已經比好多人都勇敢得多；而且過程中更多一份精彩嘅回憶。