話時話：感情走到邊緣 好好挽回的4個方法

林峯同吳千語感情已經5年，不過今年初就有指因為林父反對，加上吳千語喜愛夜蒲，又識咗個新嘅富商男友，所以林峯決定斬纜分手。不過最近就有消息話千語決心戒夜蒲，積極工作，最終成功復合仲入住埋林峯係薄扶林嘅新居添。而林峯亦有大方講到話屋企人無催婚，無呢方面嘅壓力，嚟緊仲會去旅行充一充電，睇嚟二人關係已經無乜問題啦。

大概你都有經歷過，就係當感情已經去到邊緣嘅時候，都會想辦法去挽救，你又有無試過呢？

值唔值得

首先應該諗下呢段感情仲有無留戀同值唔值得繼續落去，好似有啲即使出現咗問題但雙方都有意思去和好；相反有啲感情已經千瘡百孔難以修復。不過最重要嘅都係諗下同對方會唔會有將來，無嘅話不如就到此為止。

自我反思

自我反思係好重要，思考一下係關係中大家嘅相處發生咗咩事，例如係有邊一方面做錯或做得唔夠好、抑或大家嘅性格已經改變咗。你可以慢慢諗下然後記低先決定下一步點做，避免做錯。

大方討論

係反省過自己之後，應該都已經準備好去同另一半傾下。係討論嘅過程中可能會覺得幾hurt幾酸甚至會唔同意，但一定要保持理性同冷靜，因為你應該係嘗試解決而唔係製造更加多嘅問題。

預留空間

給予對方適當嘅空間係不能缺少嘅一步，因為都要俾時間、空間對方思考同喘息。假如你繼續進迫，迫對方俾反應、回答甚至係想知道係邊做緊咩野時，對方對你嘅印象只會愈黎愈差。

相片來源：林峯＠Facebook，karena_ngs@instagram