話時話：前度新歡高調宣示主權 仍是單身的自己點算好？

36歲嘅袁偉豪舊年就同前港姐岑杏賢結束咗三年情，事後雖然佢都開哂口想復合但最終都唔成功。不過，袁偉豪嘅單身日子似乎就完結咗，有指佢嘅新歡同樣係港姐，現年25歲嘅張寶兒，據指佢地二人係拍攝大台旅遊節目時日對夜對產生感情，番到香港後亦繼續約會，除咗係電視城泊車都泊埋一齊，連張寶兒FB 嘅cover photo都換咗佢同袁偉豪嘅合照，成數都好高。對呢件事，岑杏賢係回應時就話唔知係真定假，但如果係真嘅，都會戥佢地開心喎。

同伴侶分開大家都會覺得傷心，不過更傷心嘅可能係當你發現前度有新歡而自己暫時仲係得一個人，係呢個時候你會點做呢？

送上祝褔

知道前度有新嘅著落，既然已成事實對方又開心，畢竟大家都曾經相愛過，不妨大方地送上祝褔，亦能夠顯示自己處事成熟，拎得起亦放得低。

做好自己

趁住自己呢段單身嘅時間，努力做好自己，發掘新嘅興趣同塑造自己內在同外在，唔好俾自己消沉落去。發奮圖強，俾對方知道無咗你都一樣活得很好，佢唔識珍惜係佢嘅損失。

斷絕幻想

畢竟唔係人人係分開之後，都可以咁輕易話放低就放低，尤其係被分手嘅那一位，可能仲會心存幻想同希望會唔會有機會再復合。既然知道對方有新歡，就可以索性斷絕幻想，重新出發。

擴闊圈子

回復一個人嘅身份，其實時間變得充裕好多。呢個時候，不妨多走出去約下朋友甚至認識新嘅人擴闊自己嘅圈子，可能會有意想不到嘅驚喜。

相片來源：benontheroad & _bowiecheung@instagram