蛀牙、脫髮：長期飲蒸餾水會出事？

鉛水事件搞到人心惶惶，聽聞唔少人都已經決定唔再煲水，淨係喺超市狂掃枝裝水，貪佢擺喺屋企隨時打開就飲得，礦泉水同蒸餾水都各有支持者。日本最近就有食品廠宣布下令回收喺全日本有售、而且未過期嘅兩公升裝「富士山麓的純淨水」同「富士山的清澈水」，話檢測到致癌物超標，估計係加入太多消毒氣體，或者消毒嘅時間過長，而呢兩款礦泉水喺香港嘅SOGO同AEON都有得賣。吓？咁即係得返蒸餾水飲得？

蒸餾水夠晒純淨「乜都無」，係咪就係最健康呢？查實，我地平時飲水，唔係淨係用嚟補充返「流失嘅水分」，更重要嘅係補充返日常消耗咗嘅微量元素。所謂蒸餾水，其實你同我小學嗰陣都學過，就係收集水煮滾之後蒸發落嚟嘅水，變相入面無晒任何可溶性礦物質。即係話，無論係對人體有害嘅細菌、毒元素，抑或係對健康有幫助嘅微量元素或者礦物質，全部都會無晒。

唔好去到咁複雜，原來香港嘅食水喺60年代起，已經會係過濾同消毒之後加入用嚟防止蛀牙嘅氟化物。如果就咁飲水，咩類型嘅水都好啦，其實無辦法降低牙齒表面細菌數量，無助防止蛀牙。氟化物雖然喺牙膏都有，當你keep住係飯前飯後咁飲加咗氟化物嘅水，不斷保護返，同你無視咗呢件事，淨係日夜先擦返牙，結果就係，加速咗蛀牙嘅形成。

另外，仲有時會聽到咩軟水硬水，因為無晒可溶性礦物質，蒸餾水就屬於極軟嘅水。長期飲用再加上唔好嘅飲食習慣，身體隨時會缺乏某種礦物質，聽過唔少傳聞都話，長期飲蒸餾水係脫髮嘅一大元兇。雖然無研究證實飲蒸餾水會影響到頭髮嘅健康，但小編就因為水嘅味道同埋環保原因，都係鍾意飲就咁過濾或者煲滾咗嘅水。你又會點揀呢？