茶水間：有種公司 搵完人笨仲要話為你好

茶水間

做打工仔嘅，無一唔係為份糧；唔好再同大家講咩為夢想、社會責任呢啲假仁假義說話喇，誠實少少好唔好？所以好多時公司福利待遇就成為打工仔第一考慮嘅因素。近日討論區有網民吐苦水，話自己喺一間員工超過400人嘅大公司工作，不過好頂唔順當中嘅運作，因為公司不斷用其他大義凜然嘅理由去勞役佢哋。無錯，有人話間間公司都係咁對下屬，不過呢位樓主就一語道破：「差在未話唔加你人工，係希望你可以夠資格排公屋」，話公司做每樣衰嘢、縮骨嘢，都係話「為咗員工好」，真係寧願公司擺明車馬仲好過咁陰陰濕濕。以下呢啲橋段，大家又有無見過？

填返工時數為補水

公司無端端要求每位員工填返工放工時數，類似打咭嘅作業模式，而巧立名目話係「研究OT情況實施補水制度」。然而填咗一年幾都無甚聲氣，反而遲返早退嘅員工就被老闆捉住問點解。

無水飲因為污糟

公司原本有水機，不過某一日突然話水機太耐無清洗要拎返廠洗，結果一去無回頭，員工無水飲，要自己帶水；後來突然出現一部自動販賣機，變相員工想飲水就要自己喺公司到購買！

為公平無獎抽

公司平時每年Annual Dinner都有抽獎，但突然上年開始取消抽獎環節，老闆就話抽獎唔係位位員工有，反而對員工唔公平；決定將禮物嘅錢投資返喺公司，「為員工提供更佳嘅工作環境」。