茶水間：放假要同老細交代行蹤？！

茶水間

返工返工返工，其實好多人返工都係為咗放假，咁問題又嚟喇，咁放假其實又算唔算代表公司嘅一部分呢？因為一直以嚟好多打工仔，放假之前原來都會知會老闆。日前有討論上嘅網民話自己公司規定，放1星期或以上嘅大假，都要提交原因。好多人都話，其實員工放假原因係屬於私人原因，所以自己點解放假係屬於個人私隱。對於自己放假嘅原因講與唔講，大家似乎各有睇法。

唔講：

放假係私人原因，而假期亦係個人權利。所以根本放長假去邊做乜，公司都無任何權利干涉；哪怕員工老實不客氣咁話「自己去見工」，其實公司都係唔可以阻止員工去放假。更何況如果放假要知會公司，可能變相係令員工放長假嘅意欲減少，好似係故意阻礙員工放假喎。

講：

有人話，好多時返工做嘢唔係講規則，係講關係，所以唔係因為公司規定要講定唔講，而係對老細嘅尊重。雖然放假做乜的確係私隱，不過同老細交代一聲，草草簡單咁講一講，其實都唔係損失太多。而且最好嘅情況，老細知你放假去咗邊，都唔知亂諗你去咗見工吖。