茶水間：黃牛黨只向大陸人賣飛 反指罵港人「唔珍惜黃牛」

子華神最後一場棟篤笑令全港掀起搶飛潮，冰封三尺，更令唔少人親眼見盡黃牛黨嘅可怕之處；就係哪管有幾多十場，一樣都係一票難求，轉眼就喺網上見到有人以倍價出售門票。但正當大家都憎恨黃牛之時，原來黃牛一樣憎我哋普羅大眾？討論區日前有人話識得一個賣黃牛嘅香港人，仲公開咗部分對話，內容竟然係黃牛表示香港人「唔珍惜」黃牛，「個個畀少少錢當自己大爺」，並且話目前已經唔賣畀香港人，全部飛以一倍價錢轉售大陸；仲話香港人睇唔到Show係自己抵死。估唔到黃牛黨唔單止無覺得自己唔啱，反而覺得係香港人欠咗佢哋，因為香港人買黃牛飛時無同佢哋千恩萬謝、三跪九叩？面對咁荒謬嘅邏輯，一眾網民當然嬲爆啦，事後仲起底發現對方只係中大畢業無耐嘅年輕人，令人憤慨；其實點可以杜絕呢班黃牛黨？

死都唔買

最直接抵制方法就係完全唔買，只要大家堅持唔買，黃牛就無處出售；除非真係好似呢位中大黃牛男所講，全數賣咗返大陸。但自己一定要做好份內事，就係點都唔可買！

要求實名制

好多國家都有實名制，其實就係買飛時必須用身分證，入場再核對；只要大家要求當局做到呢點，黃牛就絕對難以瘋狂至此。