茶水間：做紀律部隊遇樽頸位 穩定但永遠發唔到達

香港地，大家都應該一致同意，公務員鐵飯碗係絕對嘅優差；畢竟今時今日，公務員薪酬水平對比私人公司，真係高出一大截；尤其係入職學歷同經驗要求都較低嘅紀律部隊，可以話係Fresh Grad嘅頭號筍工，夠膽講句係吊打90% 以上職業。不過呢，你睇人好，人睇你好；原來有唔少紀律部隊嘅巴打反而話自己好慘喎。事緣討論區有網友話自己30歲做緊紀律部隊，有3萬蚊一個月，但就覺得一直做都好唔開心。因為覺得自己唔會有職升，加上工作太穩定，令佢毫無成功感同滿足感；仲話好想離開。不過網友意見好兩極，有人話紀律部隊穩定又好Pay，出面風大雨大好難挨；不過亦有過來人話自己選擇離開，仲話無悔自己決定，點解咁講？

人工升幅

無錯，初畢業入職，人工比外面所有Fresh Grad工種都要高，但去到30歲呢啲位，如果無得再向上爬，可能3萬已經係好盡；相反私人公司，一轉工就加一截，升幅未必跑輸紀律部隊，仲未計雙糧、花紅呢。

扼殺創意空間

好多成功人士之所以能夠成功，係因為突破到自己，成功搵到出路，可能係做生意創業、可能係發展到一門專業技能；相反留喺紀律部隊呢個Comfort Zone，係無可能可以做到呢兩點，咁就惟有留守。

輪班工作

作為紀律部隊，大部分都會輪更工作，即係可能要返夜更，或者經常轉換更表；大家應該都知，凡係要輪更嘅工都係「斷六親」咁濟，成日都約唔到人；平日朋友家人放假自己又要返工，都幾慘！