炎炎夏日泰滋味_泰式椰汁雞湯 (附食譜)

近來天氣又熱又濕，望住成屋都係嘅梳打水，

諗起以前去泰國坐喺酒店床邊，望住出面嘅烈日，

嘆杯自製嘅薄荷葉青檸梳打水，嗰陣味真係好香好清新。

芙芙一直認為泰國菜用到嘅香料，總有一種好消暑嘅感覺，

可能係香味同回憶連繫嘅關係，每次聞到香茅檸檬葉嘅味道，

都會覺得特別relax。

今次為大家推介一道非常簡單嘅泰國菜式 - 泰式椰汁雞湯，

芙芙會用到美的智能高速鍋，一次過將所有材料放入鍋中，

按個煲湯制就可以坐低飲杯青檸梳打，完全唔駛睇火，

然後繼續幻想自己身處泰國，好好享受一下炎夏。

泰式椰汁雞湯 食譜

材料: 雞脾2隻、椰漿1罐400m、水700ml、蕃茄1隻、洋蔥半隻、粟米仔10條、草菇8粒、真姬菇1包、乾蔥頭5粒

香料：香茅3支、南薑6片、檸檬葉5片

調味料：青檸1個、魚露3湯匙

1. 雞脾去骨後切件，以醬油及少許糖醃20分鐘。
2. 蔬菜洗淨後，蕃茄及洋蔥切塊，乾蔥頭切件，粟米仔及草菇切半，真姬菇切根部備用。
3. 香茅只用根部，斜切後用刀拍打備用。
4. 於美的智能高速鍋中加入椰漿及水，將所有材料放入鍋中。
5. 按下菜單「煲湯」功能，煲好後加入調味料即可。

歡迎大家來到Facebook like下芙芙little kitchen

美的智能高速鍋除咗有煲湯功能，仲有一個蔬菜湯功能，

煲湯功能配合高壓技術，令食材喺短時間內煮軟出味，

好適合煲老火湯，而蔬菜湯功能就冇加壓，用嚟滾湯就岩哂。

蔬菜可以自行配搭，芙芙喜歡材料豐富一點，
所以加了粟米仔和真姬菇。

為咗令香料更出味，今次就選用煲湯功能。

因為芙媽唔食得辣，所以冇落到辣椒，食辣嘅朋友仔可以加兩條辣椒一齊煲。

如果喜歡酸味重啲，可以加多點青檸汁。

*用明火煲的話，將椰汁及水加熱後，放入香料及雞肉煮滾，

再加入蔬菜菌類，慢火把食材煮熟後放調味，即可享用。