由花瓶到康城評審 范冰冰歷年康城之路
由花瓶到成為康城評審，由喺荷里活電影客串小角色到成為國際影展常客，范冰冰呢7年非常努力，只係睇個首映行個紅地氈都出盡力搶focus。雖然外國媒體分唔到佢係邊粒冰，本地傳媒又恥笑佢衣著品味差，不過今時今日已經係「范爺」嘅佢，已經唔再需要搶fo，名正言順做主人家。其實換個角度諗都要配服范冰冰的腦力同努力，你估上位真係咁容易？等我地回味下范爺歷年的康城之路：
2010年第1次亮相康城
出度《羅賓漢》（Robin Hood）首映，充滿中國特色嘅龍袍變奏版，一行出來就知佢係中國人兼霸氣十足。
呢屆佢行左5次紅地氈，換左5個look，行程密過參展電影的主角。
2011年
參加《情迷午夜巴黎》的首映，繼續東方色彩，今年玩大紅兼大髮型。
2012年
直頭著到自己變花樽！咩叫china doll的最佳示範
2013年
作為護膚品牌大使出席康城，今年無再繼續中國風，著住大牌子晚禮服靚靚出場，不過一個傳媒見面會上一陣怪風令佢春光乍洩再次成為焦點。至於係為左套咩戲宣傳？我真係一啲都諗唔起。
2014年
因為拍緊《變種特攻：未來同盟戰》所以缺席康城。
2015年
已經係內地一線巨星的范爺，衣著漸趨低調，呢年著Ralph & Russo的粉色高訂禮服，時尚界網站RCFA話佢係best look of the week。不過網友唔多領情，笑條裙似蔥油餅，內地首富萬達集團位太子爺仲喺微博暗示范冰冰係「氈星」。衣著低調左但話題性依舊十足。
另一個造型係花花仙子look。
2016年
今年范冰冰無出席，但有另一位冰冰 —李冰冰出現。
2017年
由范爺再升呢成為國際范，呢屆係康城影展評審，換足12套衫！不過比起初初出席康城，衫同髮型已經隨意輕鬆好多。
2018年
今年簡直輕裝上陣，單係自已的氣場已經夠撐。最重要係，范爺已經係同荷里活一級影星手拖手的級數，日前就同謝茜嘉積絲婷（Jessica Chastain）、彭妮露告絲（Penelope Cruz）、瑪莉安歌迪亞（Marion Cotillard）及雷碧達尼安高（Lupita Nyong’o ）齊齊宣傳特務片《355》，連謝茜嘉個instagram都有用「范爺」張相來出post，「氈星」？你講緊邊個先？
