現實版Emma戀上靚仔上司 自問無做錯

呢排大台《幕後玩家》熱播，唔少人都非常代入角色，一時狂鬧做第三者嘅阿Moon係賤人狐狸精，一時又戥被人搶老公嘅龔嘉欣好可憐。而且網上仲有唔少「真・幕後玩家」分享親身經歷，當中有人開post話自己當年都差啲步Emma後塵，同上司發展，不過就覺得自己根本無做錯！

「Emma」話自己當年愛上咗個靚仔上司，因為佢無戴戒指，一直以為佢仲係單身，開始借機親近，已經係近乎色誘。不過靚仔上司覺得唔對路，就開始戴返戒指返工，表明已婚，但Emma根本就唔介意，繼續痴埋去，結果兩人玩曖昧玩足一年。因為喺工作上常有接觸，佢哋成日借故出雙入對，雖然最後靚仔上司都無對佢動手，但公司同事就傳佢哋已經上過床，仲話靚仔上司搞大咗佢個肚添。

Emma話就算而家諗返轉頭，都唔覺得自己有做錯，因為咁多年嚟佢都無再遇過咁靚仔嘅男人，而且佢地只係精神上出軌，無越軌行為。而佢今日再睇返劇入面嗰個Emma，反而覺得佢幾可憐，因為作為同路人，佢知道同人夫玩下就得，獻身就根本好戇居，個男人最後一定唔會放棄老婆。

帖文一出，引來批評不絕。有人就回覆，無論將故事點合理化同美化都好，都唔可能改變對方係為人之夫、而自己做咗第三者嘅事實。就算係有愛無性，嚴格嚟講都係屬於出軌嘅賤格行為。你又點睇？