獸性大發：將自家毛孩變成動物KOL 年薪百萬不是夢？

成日聽人話KOL賺錢容易，當你諗得嚟，其實每日都唔知有幾多新人出現，爭相搵食，除非有過人之處，否則幾時到你吖！但大家可能忽略咗另一個範疇，就係動物KOL！有調查講過，網絡上最多人點擊嘅短片，就係動物同小朋友，而目前最知名嘅動物明星，莫過於臭臉貓Grumpy Cat，憑佢副天生厭世樣，原來2年就已經賺咗6,400萬英磅！每段短片上載不足24小時就有過百萬點擊，非常誇張。相信有毛孩嘅朋友，都間中會放佢哋搞笑樣上網同朋友分享，其實大家又有無諗過不如直接開個Page分享，隨時成為下一個動物KOL！

尋找毛孩古怪臉

好似Grumpy Cat一副臭臉，要打響名號，首先自己要搵出毛孩最古怪嘅樣，先可以幫佢建立形象，因為普通貓狗可能得你覺得可愛，其實出面個個都一樣，所以要搵到毛孩超古怪樣先好呀！

建立特定形象

要做動物KOL，唔同你自己去個人FB到Post下相咁簡單，要幫毛孩建立一個鮮明又生動嘅形象，令人深刻咁記得；例如好懶／好為食／好兇／好曳／好傻等等，咁先可以增加跑出機會。

Crossover

要多啲同其他人其他Page聯誼，不妨試下Tag其他品牌嘅Page，甚至可以搞Fans聚會，等大家都帶埋自家毛孩同你哋一齊會見，擴闊影響圈子，另外可以同某啲名星寵物合作，實行當識多啲朋友都好吖。