【湯水】清熱潤肺:竹蔗茅根紅蘿蔔馬蹄水
依排好多大大小小嘅派對,美食當前……唔好話小朋友,就連我地大人都應該好難忍口,應該食唔少煎炸熱氣食物啦。 為食的我同小小豬都食唔少熱氣嘢呀……哈哈哈! 食左啲熱氣食物,都係時候都要清一清,煲返啲潤肺生津,又可以清熱下火嘅涼茶,所以就煲依個竹蔗茅根紅蘿蔔馬蹄水啦! 材料: 水 約2公升 竹蔗 3條 茅根 2小紮 馬蹄 10粒 紅蘿蔔 2條 糖冬瓜 少量(份量就隨自己口味) 做法: 1. 竹蔗洗淨,可對切開 2. 茅根洗淨 3. 紅蘿蔔去皮洗淨切塊 4. 馬碲洗淨去皮 5. 將所有材料(糖冬瓜除外)放入煲後加水 6. 大火滾起可以加入糖冬瓜,之後轉慢火煲1.5小時 一個既好飲又有益嘅馬蹄竹蔗茅根水就可以飲啦~ 當然…..只係飲啲水就可以啦~ 小小豬唔覺唔覺又飲左大兩杯,睇見佢飲得咁乖乖,亦都係我繼續煲多啲湯水嘅動力呀~ 依款涼茶小小豬都不知幾鐘意飲,可能就係因為甜甜地,所以我之前間唔中煲,不過就係夏天煲嘅次數多啲,但其實依款涼茶冷暖飲都一樣咁好味又有益,所以一年四季飲都啱飲呀!
原文連結: 【湯水】竹蔗茅根紅蘿蔔馬蹄水
更多相關內容