橙新聞 Orangenews
【湯文亮專欄】睇唔好樓市但對樓市有信心
投資者大多數都不睇好樓市，不過他們對樓市有信心。資料圖
有老友見我寫評論樓市文章，寫到天馬行空，但甚少寫股市評論，於是問我有沒有炒股票，我話我不但沒有炒股，就算買樓都只是用作長線投資，很少短炒。
如果我短炒物業，就一定是當初買入時做錯決定，快快手手將錯誤糾正，如果決定正確，老實說，都唔知幾多年之後才會將物業賣走，有了SSD，想立刻做糾正都不可以，所以，現在投資樓市，比以往要更加小心。
講樓市，我還可以說是勉強合格，講股市，我絕對唔夠班，獻醜不如藏拙，所以，免得過我都唔會講股市，或者我會講大市形勢，對於每一隻股票的獨立分析，免得過都免。
如果一個人喜歡投資股市及樓市，他可能有小小精神分裂，在股票市場，睇好股市的人，他大多數持有很多股票，如果他睇唔好，就會即時賣走，全部賣走也可以，在樓市，持有物業愈多的人，愈睇唔好樓市，不過，就對樓市有信心，睇唔好和有信心是有分別，睇唔好是搵把口講，有信心就要實際行動，如果一般市民睇唔好樓市，投資者跟著講又何妨，最低限度唔會得罪人。
如果大家睇好樓市，投資者話樓市有危險，只不過是叫打算買樓的人小心一些，如果樓市升，大家都非常開心，或者會有少數人取笑那些提出警告投資者，如果樓市跌，投資者可以話已經盡了責任，已經向市民提出警告，所以，擁有愈多物業的投資者，他們大多數都不睇好樓市，不過，他們對樓市有信心，擁有物業數量不斷增加。
