【流行教煮】教你整Pokemon蛋包飯＋可愛小冬甩！
香港終於有得玩Pokemon Go啦！個個夜晚食完飯落街捉小精靈，熱鬧程度同中秋節有得揮。近期全球掀起比卡超熱，除左有好多周邊商品，仲有唔少網民自製比卡超食品，超Kawaii呢~！既然大家咁想捉比卡超，一於試下整Pokemon蛋包飯同冬甩，自己整完再用個胃捕獲，呃like程度肯定及得上捉到比卡超啊！
巨型比卡超蛋包飯
日本大胃王木下佑香(Yuka Kinoshita)就教大家自製巨型比卡超蛋包飯。材料同做法簡單之餘，味道仲好好，絕對唔係得個樣㗎！一齊睇下點樣砌出超萌Pokemon蛋包飯：
1. 將罐頭吞拿魚丶鹽加入白飯調味，然後攪拌均匀。
2. 趁白飯仲有餘温，用保鮮紙包成比卡超塊面丶耳仔，同埋精靈球。
3. 定咗形之後就可以拆開保鮮紙，用三文魚覆蓋精靈球嘅上半部份。
4. 放上紫菜同芝士片做裝飾，精靈球就完成啦！
5. 雞蛋用鹽丶糖調味，煎成蛋皮，然後均匀咁鋪喺白飯上面。
6. 將紫菜剪成眼睛丶鼻同埋嘴，再用紫菜包住半隻耳仔，
7. 用芝士片裝飾眼珠部份。
8. 最後用茄汁畫上兩邊腮紅，比卡超蛋包飯就完成啦！
9. 又睇得又食得，一家大細齊齊整齊齊食，諗起都開心啊！
(圖片/食譜來源：Yuka Kinoshita )
比卡超小冬甩
各位有拖拍嘅人生勝利組，與其埋怨另一半掛住玩Pokemon Go冷落咗你，不如整呢個小冬甩氹佢啦。包保佢即刻放㡳手機，幫你捉哂d比卡超落肚！睇下做出Pokemon冬甩嘅秘技 (份量可做約7-8隻)：
1. 將360g高筋麵粉丶5g速發酵母丶50g牛油丶160ml牛奶丶45g砂糖丶1/4茶匙鹽同埋1隻雞蛋全部放入大碗中，用刮刀攪拌均匀。
2. 然後改用手搓至唔黏手嘅狀態，再放係灑上麵粉嘅枱面搓到可拉出薄膜為止。
3. 喺麵團表面噴上少許水份，蓋上保鮮紙，放係温暖嘅地方發酵一小時。
4. 一個鐘之後麵團已經發至兩倍大！用手輕輕鎚落麵團排氣。
5. 再放喺枱面搓兩分鐘左右，就可以碌平麵團，用冬甩模印出小冬甩！而周邊剩底嘅麵團就用嚟搓比卡超嘅耳仔。
6. 放係温暖嘅地方進行第二次發酵 (可以發揮創意，用剩底嘅麵團搓d精靈球㗎！)
7. 一個鐘之後，就可以攞脹卜卜嘅麵團去炸啦！
炸至兩邊金黃色~
唔好漏左d耳仔！
8. 炸好嘅冬甩稍稍放涼，然後將其中一面蘸落朱古力醬，放喺涼架上凝固。(可用白朱古力加入少許黃色可食用色素，調成朱��力醬)
記住趁表面嘅朱古力未凝固，放埋兩隻耳仔上去！
9. 凝固咗之後，用朱古力畫上眼睛丶鼻丶嘴同腮紅，咁就大功告成！
10. 入面仲好鬆軟添啊！
(圖片/食譜來源：Nino And You )
