【楊紫瓊做奶奶】Crazy Rich Asian 破除亞裔固有形象

改編自新加坡作家Kevin Kwan暢銷小說《Crazy Rich Asian》的同名電影，剛剛新鮮滾熱辣出左預告片，2位主演Constance Wu同Henry Golding仲齊齊上左《Entertainment Weekly》的封面添，個預告片連美國名嘴Ellen DeGeneres都有share，點解一套愛情片咁值得講？

故事講述新加坡富二代Nick帶左結婚對象ABC女朋友Rachel返鄉，參加朋友的婚禮兼見家長。女友起程果下先知，男朋友有樣有身材有身家簡直是新加坡版的哈里王子，唔知頭唔知路的Rachel就咁入左富豪界的鬥獸場，再加上未來奶奶（楊紫瓊飾演）覺得呢位普通人家配唔起個仔而誅多挑剔，當中的困獸鬥同八卦、中傷和大鬥法，過程非常爆笑！

睇卡士，男主角係英籍馬來西亞裔演員Henry Golding，作品唔多不過有六舊腹肌，ok？女主角係喺美劇Fresh Off the Boat演虎媽嘅Constance Wu（吳恬敏），當然另一亮點係楊紫瓊唔再演打女，而係做人奶奶！

有追開西洋娛樂的朋友們應該知道，上年美國娛樂圈的業界朋友團結一致，追求更好的工作以及社會環境，包括性別議題「Equal pay」、性侵犯問題「me too 」、多元平等「diversity」（睇今屆的奧斯卡頒獎典禮就會好清楚）等等。《Crazy Rich Asian》值得講，就因為佢正正代表左「diversity」。

近年荷里活各大studio為左內地的龐大票房，會喺套戲入面加啲中國元素，好似《天煞地球反擊戰：復甦紀元》搵Angelababy、《生化危機5之滅絕真相》有李冰冰，中國演員於全球大製作中都有不少亮相機會。不過，講緊的diversity仲包括喺西方地區出身成長的亞裔演員。《 Crazy Rich Asian》的2位主角於訪問中提及，成長以來於西方主流媒體入面搵唔到幾多亞洲人representation，睇到的亞洲演員通常都跳唔出幾個框框：打功夫、白人主角的跟班、高材生，總之同型英帥靚正無關係！今次《Crazy Rich Asian》終於見到亞裔演員擔正，仲係型仔靚女兼會浪漫談戀愛！

套戲係輕鬆愛情劇，亞裔都會談情之餘，重點在於電影入面的世界終於貼近現今的亞洲（好好好好有錢的部份可能少少離地。咁，認真，部份亞洲人都好有錢，香港都唔少隱形富豪啦！），本小說本身用好多英文溝新加坡slang同singish咁寫，套戲會唔會keep就唔知啦，不過其實好多亞裔都受西方教育但不忘本的，唔係以前睇開果種片面又單一的亞洲人囉，你知道早排睇《變形金剛》，香港仲係漁村來架！