有數計：食魚有益 唔食魚死亡率高一倍

自細父母就教導唔好揀飲擇食，魚、肉、蔬菜都要用；不過大部分人，尤其男士，出嚟工作之後又點可能咁均衡飲食，通常都係多肉少菜，不過睇埋呢個研究，睇你仲敢唔敢。

日本國立癌症研究中心同一所日本大學聯合研究，調查咗全國36萬多位人士嘅數據，主要係睇佢哋食魚嘅習慣，再將佢哋分成5種不同程度，分別係「從不食魚」至「一周食3至4次」。當中發現「從不食魚」嘅人士之中，患上大動脈瘤嘅機會大增，死亡風險係「一周食1至2次」嘅兩倍！而其他4個組別嘅機會都均等，即係話只要一星期至少食到一次魚，已經有效預防。研究指食魚可以吸收Omega 3 ，為人體主要營養素，好處多多，其中可以預防動脈硬化、心臟病等，所以話，食菜重要，不過都唔好忘記食魚呀！