是日噏day：現世代的hehe友情是如何萌生的？

男人與男人之間嘅友情，喺呢個年頭同以前好唔一樣。有所謂hehe嘅友情，係一種大家會戲謔其溫馨，彷彿同性戀人一樣既友誼。

要講呢一種比較新穎、「能成為密友大概總帶着愛」嘅男人情誼，必先要講一講以前兄弟間嘅相處係點嘅呢？就係最緊要cool，英雄本色咁款——我同你唔使講嘢，大家心照啦，有咩事兩脅插刀，有難同當。但所有嘅情感，都係不能說的情感，彷彿一講，就肉麻到頭皮發麻打冷震。

同從前呢一種帶點江湖味有冷酷嘅友情，新一代嘅巴打，發展出一種新嘅hehe友情，例如：

1、宣之於口嘅掛念
而家男仔同男仔之間既友情，掛住對方係會出聲嘅。唔難見到喺社交網絡又或者WhatsApp ，兩條仔嘅對話係：「miss me?」「Ya,miss u bro.」「I miss u too man, let’s catch up.」表達掛念，冇話欲言又止。

2、無事常致電
以前果種友情，冇咩事唔會搵對方，「有咩call我啦！」但而家嘅男人情誼，卻係「你打俾我做咩啊？」「冇啊，冇嘢做打下俾你咋嘛。」呢種冇咩特別事搵對方嘅致電，可以每日一次甚至乎兩次，冤氣過女朋友。

3、日常細節嘅噓寒問暖
例如問「你早兩日傷風好返未？」、「快啲食飯啦，你成日都冇食過野。」「你上次打波整傷過膝頭哥，而家點啊？」將所有關心都直接表達。

4、為對方買東西
你以為衫褲鞋襪又或者一啲一個人鍾意嘅小禮物，只會係女朋友先會買咩？hehe嘅兄弟，係街上面見到啱朋友嘅呢啲物品，一樣會買俾對方。

5、接放學/收工
未必一定用個「接」字，但係就會去對方學校或者公司，等埋對方收工。可能係食少少野， 或飲杯嘢吹下水咁，但係都夠晒糖癡豆夠晒溫馨啦係咪？

唔係研究社會、文化嘅人，唔夠膽拋書包。但如果就住個人成長經驗，我諗我哋呢一代人嘅hehe友情，之所以出現，同周星馳嘅電影、社會對同性戀接立嘅程度，加上呢個年代職場嘅環境不無關係。

周星馳無厘頭文化，絕對係我地成長最大嘅養分。佢當中嘅精神係咩呀？就係將固有扮晒野嘅文化，用一種戲謔嘅形式去破壞。所以英雄本色feel嘅兄弟情，我哋唔覺得有幾咁牢不可破，反而會去挑戰佢，打爛佢。打爛咗之後，就連嗰一度扮有型嘅冷漠之牆，都打破埋。

再之後，係對同性戀呢回事，唔再當係神秘魔咒。令到各位「男子漢大丈夫」，對於被誤認為基，唔再感到可怕同恐慌。

又講到社會上升嘅動力，舊一輩嘅人，個個都飛黃騰達，自己忙自己野，邊得閑理老友丫？個個大人物又愛面子。

相反而家呢一輩人，個個都晉升無望，在上者位位都坐定定喺度，任由你做十幾年都係做返同一個職位。既然冇得升，冇博殺嘅理由，咁倒不如將時間心機同埋精神，花喺身邊一齊捱騾仔嘅難兄難弟身上？

text/ Tyler Li