是日噏day：圍埋玩一個失常嘅弱勢，會顯得你高人一等，還是特別可悲？

呢幾日唔少平台都報導周柏豪有個癡情粉絲，係自己嘅Facebook發左唔少FF無限嘅留言。大家覺得佢幻想嘅瘋狂程度，非常惹笑。

首先，唔係要道德塔利班到當笑聞一則私底下笑下都唔俾。如果你問我，老實講我都覺得幾好笑。但可能我個人老土啦，部份網民除咗「笑下」以外嘅一啲行為，的確令人非常反感。呢啲行為包括咩呢？

例如有網民會主動add佢facebook啦、會留言支持佢同周柏豪嘅所謂「戀情」啦、會改圖「祝福」佢同周柏豪拉埋天窗啦⋯⋯呢一D行為，都係主動嘅、有意識嘅。

而所有呢啲行為背後，其實都係做緊同一件事—— 透過強化一位極有可能患有一定程度精神病嘅人心入面嘅幻想，去愚弄呢個素未謀面、冇得罪過你嘅人。

誇張啲去，等同一個企喺大廈天台邊緣嘅人，佢有幻覺踏前一步，唔會跌落街。後面圍左一班人，一齊笑住為佢打氣鼓勵佢試吓行前一步：「冇事架！前面有路架嘛！」同事仲暗暗竊喜圍鬧起哄。

但，去到呢一種主動推人去死嘅行為，已經完全超越左「笑下啫，犯法啊？」嘅程度，係好恐怖嘅網絡欺凌。

同一般「起底」不同，有時都仲可以話被起底者，有其可恨之處，仲有灰色地帶。但有冇人解釋得到，呢位女士犯咗咩錯？要大家不得不出手，將佢推向幻覺嘅深淵？

如果呢個陌生人，冇做過令你不得不對付佢嘅壞事，咁多人一齊集體製造一個巨大幻象去俾一個有幻覺嘅人，呢個欺凌嘅行為，嘲笑過後係咪真係會令你自覺高人一等？定還是專揀一個弱勢嘅人去霸凌，顯得你自己嘅人生，特別乏善足陳、特別可悲？

如果有一日，我嘅人生，要靠戲弄一個弱勢嘅人，去令我自我感覺良好，我諗我會寧願揀去自殺。

講完。

text by Tyler Li (facebook: 泰兄）

（圖片來源：Pakho Chau facebook）