文學經典《小婦人》再現大銀幕 卡士不得了

近來有外娛媒體報導，《小婦人》呢套文學經典將會再次被改編成電影。

小說以作者Louisa May Alcott嘅童年真實生活創作，講述4姊妹如何共患難，互相扶持以及各自經歷嘅愛情：大家姐Meg，溫柔愛美； 二家姐Jo即係主角兼作者本人，性格豪爽、衝動而且熱愛寫作；三家姐Beth善良，因為幫助困苦鄰居而不幸染病； 細妹Amy受盡萬千寵愛所以有啲任性，熱愛繪畫，而且人生最順逐。

背景雖然設於19世紀，不過姊妹情、愛情同家庭3大元素永遠不退流行，今次最新版本搵嚟憑《不得鳥小姐》技驚四座嘅靚女導演Greta Gerwig執導。Greta憑《不》完美示範少女青春反叛期同母親對抗、初戀、失身、失戀嘅成長經歷，非常到肉，亦為佢帶來唔少電影大獎提名。

今次佢執導4位小婦人嘅故事，為左發揮得更好，再次搵返《不得鳥小姐》嘅班底，即係女主角Saoirse Ronan同片中男友Timothee Chalamet再次合作，分別飾演做二家姐Jo，同埋青梅竹馬情投意合但無走埋一齊嘅Laurie。

大家姐就由Emma Watson飾演，《小婦人》係佢休息2年後復出頭炮，充過電後嘅妙麗演技會否更上一層樓？非常值得期待。三家姐Beth則由近期同Amy Adams合作電視劇《Sharp Objects》嘅新人Eliza Scanlen飾演。人生最順利嘅細妹Amy則由主演《Lady Macbeth》Florence Pugh飾演。

一班新晉上位姐仔之外，仲有梅姨Meryl Streep飾演口硬心軟嘅姑姐，淨係個演員名單都夠哂分量！

新版要下年先有得睇，不過大家可以睇住1994年個電影版本，了解下個故事先。

當年版本分別由Trini Alvarado飾演大家姐Meg，二家姐Jo由當時得令超紅玉女Winona Ryder飾演， 而三妹就由當年仲係新人、仲未同Leonardo DeCaprio拍《Romeo + Juliet》嘅Claire Danes飾演。細妹係後來成為千禧第一代「蜘蛛女」Kirsten Dunst（佢當時真係小妹妹乙個！）。而同二家姐談情嘅Laurie就由《蝙蝠俠》大紅嘅Christian Bale飾演。24年過後，以上演員仍然活躍影壇，大部份仲成為左一線巨星添！

《小婦人》已經多次被翻拍成電視劇同電影，咁多經典在前，Greta Gerwig會點樣演繹拍出新意？大家拭目以待。