【抗潮濕】10大辣到出汗美食！
對抗潮濕天氣，「食辣」到底有無用？要問過中醫先知。不過吃貨就200%肯定，回南天時，辣到冒汗的感覺就最醒神！—— 泰式咖喱雞麵、川式麻辣米線、美式爆辣雞翼、日式辣拉麵……係時候出動喇！春天唔食，等幾時？
【立即讚好】全新 Yahoo Food Facebook 專頁
泰北咖喱雞麵 $128。「蛋麵」是灣仔人氣小店”Samsen”的生招牌，配的咖喱膽以椰漿、本地雞、魚露、棕櫚糖及大量泰國香料調味。咖喱不是一味辣，而帶陣陣香料香。仲唔夠味？還有泰國辣椒、醃菜及紅蔥分開上碟，勁豐富！不過這item不在餐牌上，亦不是定期供應，要食，就要問過侍應先知。(a)
餐廳特訂的蛋麵，像港式粗麵，不過就彈牙又滑得多。部份麵炸脆放在湯面，其餘的浸在咖喱中，初初食幾香甜，食食下都feel到辣勁，要叫個椰青解辣先得。(a)
打拋葉香蒜辣椒炒和牛 $128。另一款小菜看上去辣椒多多，不過就只是微辣。將和牛，魚露及飯拌匀，大啖吞下，少少辣，又幾惹味。(a)
淨菜肉雲吞$19（圖為小辣）。貴有貴辣，平有平辣！太子”津津好好味”的雲吞出名夠平又飽肚，每碗約12/13粒，雖然雲吞內無蝦，麻香亦不重，但都抵食啦！受得辣的建議直接叫大辣！因為小辣實在太弱雞，中辣算剛剛好。(b)
雜醬麵 $24（圖為小辣）。一碗飽到上心口！麵條有點太腍，不過叫中辣的話，有麻辣味搭救，好味！(b)
魔鬼雞翼 $98。或者你聽過世界上有個「辣椒排行榜」，咁你有無聽過「魔鬼辣椒」(Ghost Chili)？這椒曾是世界上最辣的辣椒，就算後來被奪冠，也仍然保持在10名之內。上環餐廳” Café 2 Oyster n Grill”最近就結合「魔鬼辣椒」及水牛雞翼，有3種辣度可揀。
最辣的level 3，大廚話其實只加了 3匙「魔鬼辣椒油」，但就足夠你辣到噴火！小記親口試過，雞翼小小，但食一隻，已經辣到咀唇麻疹……飲幾杯水都解唔到辣，辣勁最少維持了15分鐘。餐廳就此設立比賽，如果食客可以在5分鐘食完5隻魔鬼雞翼(全程只提供一杯水)，除了該份雞翼免費，仲可以贏到現金coupon！(c )
肉醬蜆殼粉 $138(普通辣版)、$178(極辣地獄版)。同樣用魔鬼辣椒炮製，唔好睇佢外表唔夠橙紅，小記寫包單，(極辣版)食兩啖，辣勁就可以完全攻陷你口腔，唔食得辣嘅建議唔好試。(c )
「魔鬼辣椒」真身。網上找找資料，佢比普通辣椒辣100倍, 比指天椒辣約4倍, 更有指比普通Tabasco辣400倍之多，真係唔係講笑。(c )
特上辛辣味噌拉麵 $93。荃灣人氣小店”豚道樂”的招牌item之一，熬超過12小時的豬骨加辣，配肩肉、腩肉及溏心蛋。唔好以為拉麵辣唔出樣，食過你就知。(d)
麵條掛湯，啜入口愈食愈辣，輕炙過的豚肉偏瘦，不過都幾香口。(d)
特上日本芥末拉麵 $93。另一款招牌item就是店主自創的wasabi湯底，不過其實唔太辣，只有淡淡wasabi的香氣，也加入3種不同芝士碎，入口竟然少少甜，幾特別。(d)
重慶口水雞(例) $70。口水雞食得多，銅鑼灣” 渝酸辣粉”的版本可說是坊間最辣之一。口水雞可選不同辣度，但小辣(對普通人來說)已經好夠！雞件算滑，肉不算多，浸在紅油中，食多幾件已經舌尖發麻，刺激！帶點點花椒八角香。(e)
重慶酸辣粉 $36。比坊間的更酸，麻味不重，小辣已經辣勁十足！一碗仔細細的，食到一半已經飲水都無用。(e)
四川燃燒麵 $53。自問嗜辣的必叫！別看它顏色素白，叫做「燃燒麵」是因為麵上那一小撮「辣椒蓉」及麵底的辣油。(e)
撈匀後，淡橙色的麵，吃一箸唔覺，吃兩箸唔覺，第三/四箸後，辣勁開始發揮，辣入喉嚨，而且辣得特別持久，食完一碗，舌頭除了麻就沒其他感覺了。建議2人share一碗試試。(e)
【立即讚好】全新 Yahoo Food Facebook 專頁
Shop info
a/ Samsen
地址：灣仔石水渠街68號地下 (2234 0001)
b/ 津津好好味
地址：太子長沙灣道51號地下 (電話從缺)
c/ Café 2 Oyster n Grill
地址：西環皇后大道西371號地下 (2295 6668)
d/ 豚道樂
地址：荃灣大河道63號卓明大廈地舖 (3956 9163)
e/ 渝酸辣粉
地址：銅鑼灣耀華街4號 (2838 8198)
