戀愛系：80後嘅你嚟到今日 往後嘅人生已經定好晒！

去到年尾，80後嘅你數下數下，就算最後生嘅都已經就3張。唔知你哋過得好嘛？回想畢業好似仲係近年嘅事，但原來一轉眼已經去到呢個階段。當初嘅你當然會成日諗住自己後生，大把時間做想做嘅事，可以不惜浪費光陰，甚至虛耗青春；但去到宜家，突然發現原來自己開始老喇，更加無幾多時間可以浪費，係時候為將來打算。下！你宜家先諗為將來打算？死得啦！原來根據唔少統計數字，30歲係好多人一生嘅分界點，係「一生」。即係話30歲嘅人如果仲係一位小職員、小薯而毫無重要性，對唔住，好大機會你人生之後都會繼續係小薯，只不過係老一啲嘅小薯。

人生就係咁殘酷，君不見好多30歲嘅朋友，憑住自己嘅努力（加上Daddy嘅支持），已經有車有樓有成功穩定嘅事業，更莫講話有經濟能力生咗幾件小朋友。當你喺面書上見到好多朋友成日Post相都係攬住老婆仔女坐喺屋企，望住海景；再繼而望望自己仲同父母住，未知幾時有錢同另一半搵到一個自己嘅家，你就唔可以否認，原來30歲嘅你，已經肯定到自己之後嘅人生，只係你唔想去認清事實。討論區經常有人話要「砍掉重練」、「刷首抽」，大家千萬唔好諗埋一邊，因為真正嘅重刷已經好多人做緊，就係移民；不過可悲嘅係，移民咪又係要錢，認命吧80後。

圖片擷取自網上短片：《月入三萬的香港人》