戀愛系：網上太多狗公 男友迫女友放閃顯示主權？

放閃可以話係現代情侶嘅必備手法，畢竟人人都有用社交網站，閒來無事都鍾意放下拍拖相上去畀人Like下；通常呢個動作，有90%都係女仔做，而近日討論區就有女網友話好煩惱！呢位女網友話自己平日好少用IG、FB，最多都係齋睇，唔會回應亦唔會Post嘢；不過佢男友同佢拍拖一年之後，開始不斷要求佢貼放閃相。由一開始好似講笑咁問「你做咩唔放下閃嘅？」至後來愈嚟愈強硬，甚至仲直接命令佢要貼相。唔好網民都話佢男朋友太大男人，肯定係想女朋友表明自己名花有主，以防有狂風浪蝶。不過有唔少男網民又真係話網上好多呢啲白撞男，即係借頭借路識女仔。面對呢啲男士，最好嘅方法莫過一開始就話畀佢哋知自己有男朋友！究竟女士們放閃仲對男朋友有咩好處？

絕世好仔

姑勿論實際上係點都好，女士們喺社交網站放得閃，即係等於話畀全世界知自己好幸福；當然變相讚揚身邊嗰位男士照顧得自己好好，例如生日炮製驚喜浪漫、平日送贈有意義禮物等，為男士形象大大加分！

有好日子過

好多時候男人有無好日子過，其實咪就係視乎身邊位女士係咪過得開心囉；至於女士要過得開心，其中一個方法就係透過放閃，令自己頓覺幸福，靠全世界嘅Like同埋羨慕去突顯自己幸福，從而男士都有好日子過喇。

努力有回報

講真，男人面對愛人其實做一切都係只求女士們開心；如果女士真係高調放閃，都係代表女士真心滿意，咁男士們之前做嘅所有都叫做得有價值，付出有回報；男人，好多時，就係只求咁多架咋！