戀愛系：睇戲唔傾計 真係好難咩？！

最近一套上畫電影《無聲絕景》大家睇咗未？故事講一群不明生物憑聲音去獵殺人類，主角一家就係要無聲咁生存，一發出聲響就有殺身之禍。由於電影呢個設定，令到大半套戲都係極為寧靜，變相戲院嘅環境就好關鍵。有網民話睇嗰陣全場觀眾都保持到寧靜，配合套戲嘅氣氛；但又有人話戲院依舊極多嘈雜聲，令人忍唔住諗，如果睇戲都會有呢種一出聲就殺人嘅怪物就好！又的確，睇戲遇著係咁講嘢嘅觀眾，真係好令人崩潰，明明睇戲唔出聲應該係好基本嘅常識，點解都有人不停都去挑戰眾人嘅底線，唔通佢哋自己就聽唔出自己有幾大聲？遇上戲院講嘢怪，大家會點應付？

大聲鬧

最直接嘅手段，遇著不停講嘢，而且屢勸不改的話，直接大聲鬧佢，例如「講嘢出去講啦！」香港大部分欺善怕惡，通常都會收聲；不過有風險係佢還口，演變成罵戰，就會被其他觀眾埋怨。

職員投訴

好多人唔知，其實如果唔想自己出面，係可以出去要求職員協助；不過首先你要離開去搵職員，變相會睇漏咗幾分鐘；其次好多職員都係「做樣」咁叫勸一次，通常無乜作用。

以暴易暴

呢個方法好唔建議，但出於最後一招可以考慮，就係同佢鬥大聲！喺戲院講嘢嘅人都係非常自私，眼中只有自己嘅人；所以你要令佢感受到其他人嘅苦況，就要比佢大聲，實行攬炒，大家都唔好靜！