戀愛系：男朋友對人超自私 女友話覺得好丟架

談戀愛？好多人話最緊要係對方錫自己，係咪真係咁簡單？如果對方好錫自己，但對外人又係另一個樣，你會點？最近討論區有絲打話自己男朋友一直好錫自己，當佢如珠如寶；但偏偏喺外面對住其他人，男朋友就係一個百分百嘅自私精。包括見到有人影相永遠都唔會避開，大刺刺咁行過中間；又例如喺食店食飯，明明外面好多人排隊，但食完都唔肯走死要霸住；又例如去旅行住酒店搞到全房立立亂同好污糟。呢位絲打覺得男朋友太自私，有時會覺得好丟架。一眾網民就一面倒抨擊佢男朋友，話覺得縱使係對佢好，但如果本身係個人道德層面有問題，咁都唔係好嘅伴侶，仲話日後只會變本加厲。一個天性自私嘅男人，究竟會對伴侶造出咩行為？

唔識顧及別人感受

為人自私，好大程度就係因為無同理心，唔識得推己及人，為他人設想；一位咁嘅男士又點會有廣闊胸襟；其實多數都難成大器，因此日後嘅路都未必會非常好，簡單講一句：無前途呀！

他朝反轉豬肚

今日係自私男，他日亦好大機會會背叛你；雖然目前對女朋友好好，但一個自私自利嘅男人，萬一日後真係變心，相信會對女方造成極大打擊，更預期到會不留情面咁傷害女方。

未必愛屋及烏

一個好伴侶唔單止對自己好，仲要對埋自己屋企人好。如果男友太自私，可能只會因為愛你而對你一個好，但你嘅屋企人對於佢嚟講就未必係好重要；你都唔想日後結婚為咗屋企嘅事同老公日日家嘈屋閉架。