戀愛系：一位拍拖十年嘅女友 連一個手袋都唔值？

拍拖十年，係一個咩概念？好多女仔用上十年嘅青春，同一個男仔一齊，不過仍然未等到男方求婚，似乎好淒美。討論區有位男網友就話同女友拍拖十年，升大學時開始，其間女友一直無咩特別要求，咁耐以嚟男友最貴都只係送個一個2千蚊手袋，一用就用咗5年。近日女友就Send相畀佢話睇中咗個Hermes手袋話好靚。男網友於時問大家送唔送好喎。目前兩個係租樓住，話原本女方住私樓，男方住公屋，目前住屋環境比女方原本老家要差，覺得女方一直委屈緊自己；但同時佢哋儲緊錢買樓，如果買貴手袋，只會令上車時間又推遲。感到好兩難；當然之後男網民被人鬧到七彩，主要係話女方十年以嚟只係要求一個手袋，咁仲要考慮，覺得男方好市儈。其實一個肯同你拍10年拖嘅女人，真係唔易搵！

望夫成龍

老土咁講句，跟男友十年，一直又唔要求結婚要求買樓，但都不捨不棄，主要都係因為相信你咋！覺得你今日未必有，將來一定會有，真愛是真，唔會因為你目前一無所有就唔要你！

平淡是福

有時好多壓力都係男人自己畀自己，就算女方無提過，男人都會覺得對方需要；例如男人會諗每個女人都要有樓有車先幸福，但有無諗過女方嘅幸福，就只係男方喺佢身邊就得呢？鹹魚白菜也好好味！

女人自強

邊個話女人一定要靠男人？就算明知自己男伴唔爭氣，咪自己去努力囉，香港呢個社會，好多老婆賺錢多過老公嘅情況；做女人嘅，最緊要有個開心嘅生活，有一個乖乖嘅老公，何必一定旨意個男人發達先？