戀愛系：不成文規定 有車追女仔容易好多？

香港地，要講買樓，對於一般人，又無父幹的話真係可以不可觸及嘅夢；但另一邊廂要有架車仔就相對易好多！畢竟話買車容易上車難，但喺香港要養得起一架車仍然係可以。好似政府高官話齋，好多年輕人，買唔起樓，可能寧願買部車等自己有啲私人空間。我知我知，好多人會衝出嚟話，「香港咁細，使乜開車，坐的士仲快啦！」所謂子非魚，焉知魚子樂。有車，從來都會喺愛情路上加好多分。嗱嗱嗱，我知你哋又會話人膚淺，覺得係「港女先會咁勢利囉」。少年你真係太年輕了，你以為港女因為一個男人有車就鍾意對方就係勢利？咁你就睇得太表面喇！鍾意一個有車嘅男人，唔係因為佢有錢，唔係因為食完飯個個朋友要搭巴士自己有人送，（雖然唔排除好多女仔係）係因為。。。。。。

拍拖節目多

香港咁細，本身已經無乜咩娛樂，拍拖更加係完全死板，不外乎去下商場睇下戲食個飯；但有架車仔，即時拉闊個活動範圍，而且不限時間，拍拖活動多咗，情趣自然亦多咗，感情當然又好咗，就係咁簡單！

二人空間提升

重回香港最核心問題，買樓都係為咗兩個有獨對嘅空間，但要有樓咁難，有車就易好多。有車其實就代表二人有私人空間，你哋唔好諗邪嘢先，我係指二人平時喺車度，傾計對話嘅時間都多咗，感情自然有所提升啦。

心理質素

先唔好咁現實講有實等如有錢，其實一個人有車要養，正好代表佢要不斷推進自己繼續努力工作，亦代表佢係一個有上進心嘅男人，同時間要努力增值自己再搵錢去升值自己架車，亦算係一個有Commitment嘅男人啦。