戀愛系：鍾意食茶餐廳就叫貼地？未免太睇小男人對茶記嘅情意結喇！

好幾年前一篇網絡潮文講人生搵到一個肯同你捱麥記嘅女人，就係已經代幸福。自此之後，好多自以為貼地嘅女神出現；除此話自己唔介意食麥記之外，仲要強調自己鍾意茶餐廳，鍾意食佬飯，同埋唔鍾意去Fine Dinning之類。好似近日，有文青女神之稱嘅袁澧林就喺自己IG到表示「茶餐廳是我最愛的地方」。好多網民都讚佢夠貼地，仲話希望自己女朋友都係好似佢咁。呢度先唔去猜測人家講嘅孰真孰假，不過想講嘅，今時今日，好多女仔以為自己「唔介意去食茶餐廳」就代表係貼地係非港女，其實太睇輕茶餐廳對於一眾男士一眾佬嘅意義喇。男人去茶餐廳，唔係齋因為平咁簡單，如果閣下係一個連以下幾點都接受到嘅女生，先係真正嘅「貼地」囉！

不斷食同一個餐

好多佬鍾意茶記，係貪唔使點諗，食開乜就叫乜；有個笑話係話「男人可以連續食幾日同一樣嘅餐」，無錯，茶記之奧妙亦在於提供男人永不厭倦嘅幾個常餐；女人？自問可唔可以連續兩日食同一個餐先？

搭枱文化

茶記另一好處係出入人流快，去食就即刻入到唔使點等，但代價就係要搭枱，呢種中國式搭枱文化，講乜都會畀對方聽到，一般女仔其實頗為介懷，而且特別係自以為靚嘅女士，更會不停覺得被人「視覺非禮」。

無視脂肪

茶餐廳深得佬歡心，因為好味，好味嘅原因當然係因為唔怕肥唔怕無營養，一眾垃圾食物愈無營養愈好食，但代價就係高熱量高脂肪。女士話鍾意食茶餐廳，有無諗過日日食有幾肥先？定每次都要計晒卡路里先點餐？