戀愛系：科學家搵出夫妻之間最大「敵人」

每對新人結婚之時，都會希望白頭到老。不過可以達到嘅究竟有幾多人？好多人可能都會以一對夫妻有無「夫妻相」或者「相處方法」甚至「家庭背景」去推測佢哋可唔可以白頭到老，執子之手與子偕老。但當然以上嘅方法又點會準，君不見好多人哋所見嘅「模範夫妻」最後都係離婚收場；原來有人就研究到一個更科學嘅方法去推斷。美國西雅圖大學心理學教授John Gottman，就早喺1992年開始，做咗一個長達25年嘅追蹤調查；訪問700對夫妻，主要問及佢哋日常相處之間，「開心」與「唔開心」嘅時間，並將佢哋「開心」與「唔開心」嘅時間分成比例，經過25年，再搵番呢班夫妻，得出以下結果。

到目前仍然一齊情比金堅嘅夫妻，係當年「開心比例」5：1嘅Couple，即係開心同唔開心嘅時間比例係5對1。至於離婚嘅夫妻，「開心比例」就係1：1 。John話夫妻之間經常出現負面評語係最致命嘅打擊，其中頭號大敵係「發脾氣」，只要發脾氣就會出現消極、單打嘅對話，甚至講出好多未經大腦嘅說話，影響係極度巨大。5：1，大家記住呢個比例，如果變成實體化，不如就諗成「今日發咗脾氣，未來5日都唔可以再發」，就係咁簡單！