戀愛系：男人一日講3個大話 你有無聽過呢幾種？

男女朋友或者夫妻之間相處，貴乎坦誠，鬼唔知阿媽係女人嘅真理，但係真係做到100%誠實嘅人，有幾多人？可能做聖人仲容易啦！根據德國一間研究機構「寶馬金融中心」嘅研究調查，男人一日之內，就已經會對伴侶講3個大話！不過呢，大話有時未必代表對你唔好，或者想傷害你；原來男人對伴侶講嘅大話，有好多係屬於善意嘅大話。心理學家話呢3個大話可以分成3類。

善意大話對你好

最常例子係「我著呢條裙會唔會顯得好肥？」「當然唔會啦，好Fit！」無錯，男人呢種大話某程度上係唔想Hurt女士嘅心；不過同時係保護自己，唔想煩，你知啦，真相往往令人難以接受。

自吹自擂建立信心

男人無論幾多歲，其實心入面都係一個小朋友，要威又要人讚佢叻嘅小朋友，所以會講大話讚自己，例如「我以前學校打校隊」、「我上一份工係最Top員工之一」，無非都係另一伴讚下佢哋，醒目嘅就咪篤穿佢哋喇。

推卻責任免除麻煩

例子包括「我今晚唔去你朋友聚會，我嘅舊患又開始痛。」「我完成埋手頭呢個Project就開始Plan旅行啦。」其實就係唔想麻煩唔想負責，男人都係有拖延症，用大話可以解決，就講大話啦！