戀愛系：唔知幾時開始 話錫老婆係會畀人笑

睇開愛情金句嘅，一定有睇過類似嘅「老婆係要嚟錫，唔係要嚟怕嘅。」聽落係咪好冧？如果喺名人明星把口，大庭廣眾之下講，更加會令人覺得係絕世好男人！不過，當環境鏡頭一轉，萬一喺一班朋友之下，一個男人咁講，就絕對引嚟無限恥笑。唔知幾時開始，一個錫老婆嘅男人，係成為一眾朋友嘅笑柄，一個可以講無限次嘅笑點話題。好多時，男人聚會，反而要同大家講自己有幾唔緊張老婆，然後一返到屋企即刻變番老婆奴。原來男人之間，有一種唔出聲嘅約定，就係唔可以話自己好錫老婆。究竟男人點解有呢種「不能說的秘密」呢？

雄性心態

最天然嘅雄性心態，大家互相比較一下，口頭上拎下威都係必然嘅事；如果咁嘅情況之下，仲點可能話自己好錫老婆，好似有失雄性尊嚴（唔好問點解，天性使然）。因此惟有個個都話唔怕啦。

怕被離棄

男人朋友之間，總會有好多唔畀人睇唔畀人知嘅資訊，間中污穢不堪嘅對話更加係女人諗都無諗過嘅。因此，大家要確保對方唔會因為錫老婆而向老婆誠實公開一切對話，為咗唔被人踢出Group，梗係話唔錫啦！

怕被誤會

正如好多女人話齋，男人如果突然對自己好，實係因為做咗虧心事。因此朋友間如果有人好錫老婆，咁大家第一時間就會諗就係佢做咗對老婆唔住嘅事。如是者，大家為咗以示清白，反而唔會表現得太好。