戀愛系：叫女朋友做運動 慘過畀人打一身

時下好多女人都熱愛運動，甚至無運動不歡；係，你可以話佢哋好多為咗打咭呃Like，但姑勿論出發點係咩，始終佢哋肯穿起運動衫落街跑個步。對比起嚟，其實好多女人係完全唔做運動，可以話係同運動絕緣！呢種女性平日可能係太忙，導致有時間時都用咗去行街Shopping。最近有網民就話自己女朋友愈嚟愈肥，叫佢做運動減肥唔單止唔肯，仲反而畀女朋友鬧佢「係咪嫌棄」。事實上，男定女都好，一到咗某個年紀，其實一唔持續咁做運動就會不斷肥落去，好難返轉頭。但有網民就話，做運動畢竟係個人自己，就算身為另一半都唔可以強求。其實想女朋友做多啲運動，係要花少少心思，畢竟做運動辛苦、食嘢瞓覺好易。

跑步以外

好多一講做運動就係落街跑步，其實未必個個女仔喜歡，不妨同佢試多啲其他運動，例如游水、單車、羽毛球甚至健身，可能會有一樣嘢中；唔理咩運動都好，只求有益！

定下目標

對平日無做開運動嘅人嚟講，突然要做運動確係辛苦，必須提出具體目標，除咗功能性要減肥例如結婚、影Pre-Wedding之外，亦可以定立例如1個月要減幾多嘅目標，咁自然會有多少少動力。

共同嗜好

做運動未必係好享受嘅事（始終唔係Hardcore），所以要令人肯做運動，首先你自己要以身作則，甚至成為佢運動上嘅Teammate，大家每次都一齊去做，自然培養到佢做運動嘅興趣之後，就可以由佢自己去喇。