戀愛系：做女人 只求一個肯Plan旅行嘅男人

香港人鍾意去旅行，相合無人唔知唔覺架啦。咁無辦法，香港生活咁壓抑，只有離開先會感到生活嘅氣息；不過對好多嚟講，去旅行之前就夠晒壓抑喇，講嘅就係同男朋友去旅行，但乜都要自己Plan晒嘅女士們喇！好多女仔都有所不滿，覺得每次去旅行無論機票同住宿、景點、餐廳等計劃，男朋友都採取放任態度，完全0參與，攤開對手等女仔Plan好晒，自己只係帶個人去就算。如果個女仔本身係旅遊達人，好樂於投入就話啫，但如果大家都係普通人，要返工放工，旅行所有嘢由女友搞晒，其實係相當辛苦架。網上討論區就有網民話，如果你男朋友去親旅行之前都坐定粒六得女友搞晒所有嘢，飛得！

不負責任

見微知著，去旅行乜都唔理，話你知，呢個男人第時同你結婚亦會乜都唔理，咩婚宴場地、佈置、禮服等等煩瑣事，完全唔會理；及至日後買樓生仔，可以想像到都係你自己一力承擔，怕未？

不會承擔

老實講Plan旅行的確係苦差，如果男朋友甘願畀你一個人自己咁辛苦處理，其實佢都唔夠愛你，試問愛一個人，你會忍心見佢咁辛苦，而自己就一啲手都唔幫？就算乜都唔識，都要扮下嘢做下Research吖大哥！

有錢大晒

有啲男朋友，尚抱有一個心態，可能去旅行錢就畀晒，但無諗住幫手，一心就係「我出錢，其他嘢你搞晒佢」，喂，咁樣其實同請個秘書無咩分別；係，你畀錢你係老闆，咁你女朋友唔通就等如要做晒所有嘢咩？