戀愛系：中秋大驚嚇 女朋友自製月餅勁難食！

好多女朋友都覺得，親手煮一餐飯畀男朋友係一件好偉大嘅事，再推演落去，親自DIY美食好似朱古力、曲奇餅，就更加有心。好多女仔會選擇喺情人節整朱古力，甚至男朋友生日整蛋糕，不過近日有位網民就表示，最驚嚇係前女友竟然喺中秋節整月餅！仲要佢平日都無特別整開食物，只係見到網上教學，又覺得中秋自己整月餅好有氣氛，於是就自己親下廚。結果係點？樓主嘅食評係「月餅有好大條裂紋，就嚟成個爆開，好明顯係太多餡，皮又焗得唔夠鬆，食落係餅乾加蓮蓉嘅感覺。」結論就係人要知自己長短，唔好勉強，尤其整嘢食，難食事小，食物中毒事大。除咗DIY美食，仲有咩女朋友嘅「心思嘢」其實對男朋友嚟講係無感呢？

DIY相冊

女人好鍾意回憶，所以好珍惜相片，想成日睇到某啲甜蜜回憶，於是想整啲相冊、「Memory Box」之類；老實講男人對於呢類DIY係無乜感覺，因為佢哋連結婚嘅相同片都唔會再睇，何況你哋平日啲相？

DIY飾物

女人係永遠買唔夠飾物，咩耳環、頸鏈、手鏈，戴得上身嘅飾物幾乎可以買完又買，永無止境；但係當女人諗住咁整畀男士就唔好喇，因為男人好顧型象，太Cute又唔得，太有型又驚唔夾，好難夾口味！

DIY情侶Tee

最後呢樣永遠啲女士都搞唔清楚，情侶裝嘅衫100個男人有120個都唔鍾意，如果女朋友仲要DIY埋畀佢哋，即係更加係迫佢哋要著，100萬個唔願意寫晒喺塊面度。記住任何男人話佢自己「OK情侶裝」，都係講緊大話！