愛上 鍾嘉欣BB
一幅超deep V性感廣告照，讓入行八年的鍾嘉欣（Linda），獲高登網友封為嘉欣BB，失驚無神晉身性感女神之列。鍾嘉欣的人生算是一帆風順，讀完書贏華姐選美入娛樂圈，第一套劇就成功上位當上一線花旦，不過能夠得到嘉欣BB美譽，代表在網民心中，仍保有出娛樂污泥而不染的清純特質。靚女在娛樂圈一炮而紅並不少見，能保持清純感覺的卻不多（至少表面如是）。嘉欣BB就始終認為：「我的家在加拿大，香港只是工作的地方，我相信最後都係會返去生活。」 雖然香港這個地方讓她得到很多：「收入絕對比留在加拿大當小學教師好得多！」既能在香港置業收租，又可以在老家買大屋讓父母安居。不過，BB都有寂寞時，家人遠在天邊，緋聞男友又話冇，仲要孤身留港搵銀供樓，所有情況都符合高登女神條件，嘉欣BB稱號絕對當之無愧。 爆煲ＢＢ 話明係ＢＢ，即是人生經歷不多，雖然鍾嘉欣在娛樂圈轉眼間也打滾了八個年頭，不過若你想在這篇訪問，睇到甚麼人生高低起伏、波瀾壯闊、嘗盡人間辛酸最後成功上位，感人肺腑攢人熱淚故事的話，Sorry！嘉欣ＢＢ幫你唔到。就像湊ＢＢ一樣，你只能提供細心呵護，但卻難免有點悶。 不過，娛樂圈中人壓力大，不時都有人話抑鬱症、情緒病，連ＢＢ都曾經試過差點爆煲。 「我是一個會畀好大壓力自己的人，工作上特別如是，只是人慢慢長大，知道這種態度其實不正常，以前不論遇上任何情況，個人都會好緊張，就如頒獎禮應該好開心去參與，但係我會不停擔心，有機會上台的話到底要講乜，緊張到手震、手心流晒汗，但其實根本唔知驚乜，我相信係驚恐症的一種。 「直到四、五年前，突然開始失眠，係好嚴重0個隻，連續三個月晚晚眼光光瞓唔到，朋友見到我直情話我似喪屍，個人近乎崩潰，個腦都停頓晒。」 嘉欣ＢＢ曾經嘗試各種方法去解決，甚至要放假返加拿大，心情才得以慢慢平復。 「當時情緒低落到個個朋友都叫我留在加拿大，唔好返來，話我唔適合留在香港工作。 「最終係祈禱去求上主，接受失眠這回事，之後竟然就成功安睡，雖然我好少返教會，不過我認為只要真心信就得。」 事後開始由信佛變成基督徒，信主也有四年了。 搏命ＢＢ 做明星唔同打份工，唔做到大紅大紫，不如唔好做。 這正是鍾嘉欣壓力的由來，曾經很想很想得到獎項，為此拼命工作不眠不休，鍾媽媽更年年帶嘉欣ＢＢ去批命睇運程。 「我小時候因為屋企人的關係，由細到大都有去拜神，仲會跟住媽媽燒好多衣紙，風水都信，屋企會擺好多東西。試過問師傅點解當年唔好？話我因為屬鼠所以點點點，但又話我好聰明叻女，係一隻老鼠王，一定會成功，但搞完一輪之後又唔覺變好，自己好辛苦。師傅話我二○一二年、二○一三年娛樂圈運最好，會有機會攞獎，但我唔信啦！年年都話我有機會啦！ 「反而是信主之後個人平和了很多，我知道上主點都會聽我祈禱、佢叫我做人要開心，用愛去工作、去愛人就是了。」 宅女ＢＢ 鍾嘉欣外形斯文淡靜，說話慢條斯理，單睇外表其實已經有幾分宅女成分。 「我性格好騰雞、好怕事，我絕不會做任何冒險的事，朋友同學個個都估我會是最早結婚生仔的一個，點知我反而是最遲的，她們連仔女都有兩個了。」 只是她亦感激有機會來香港工作，嘉欣ＢＢ自言，留在加拿大的話一定唔會有今日。 「我只能夠講，來香港工作，成績我其實滿意到爆，特別是經濟上我好滿意，收入一定好過留在當地，若果我留低，一定會做小學教師，我有兩個best friend，一齊長大讀書，家一個是中學家政教師、一個是小學老師，當年我們三個人志願都是做教師，但要在當地搵到份教書工都唔容易。」 現在香港有樓收租，剛剛在加拿大還買了新屋給爸爸媽媽住，嘉欣ＢＢ就一個人留港繼續搏命搵真銀。 「自己在香港工作，一個人好孤獨，我其實唔適合自己一個人住，在加拿大有家姊陪，去廁所都兩姊妹一齊。平日生活唔係開工的話，就留在家買餸煲湯，所以我成日去街市shooping，次次畀人影到都係話我去買嘢返屋企煮飯囉！」 尋愛ＢＢ 嘉欣ＢＢ二十八歲了，不經不覺在香港生活了八年，但總感覺家是在加拿大，雖然習慣這裏的生活，但她說最終還是會選擇返回加拿大生活，建立屬於自己的家。 「至少我自問人生路冇行錯，做到自己最喜歡的工作，每個人都總有自己的路，從前諗住二十四、五歲結婚，有師傅話我三十歲前一定會結婚，現在就想三十一歲前可以結婚吧！」 問題是嘉欣ＢＢ一直報稱單身，未找到理想結婚對象，但就奇怪在訪問前，便有消息人士告訴我，最好別提緋聞男友伍允龍的名字，否則嘉欣ＢＢ必定黑面。 「總之我一定會結婚，但緣份要順其自然。媽媽成日催我，我話你唔好催啦！你愈講我愈急，最怕最後揀個爛燈盞，結咗婚至發現有問題再離婚咪仲煩！而且一定會生小朋友，媽媽話做女人一定要生仔，這是女人天生要做的事，生過小朋友至係完美，我都係咁諗。」 只是三十一歲要嫁的目標，嘉欣ＢＢ相信未必能夠輕易完成，除了理想對象未見人外，和ＴＶＢ的合約要到三十三歲才完。 「冇辦法啦！愛情要來的時候，都要搵夠錢供樓至得0架！」 ＢＢ，其實還是有現實的一面。 白馬黎明王子 嘉欣BB在溫哥華出生長大，環境純樸一點，思想也似乎單純一點，就連時間，也好像行得慢了香港一點。 直到中學畢業，夢中情人仍然是九十年代最紅的四大天王黎明。 「黎明把聲又甜、眼神又識放電！你唔覺咩？ 「我以前成日發夢，見到黎明騎住隻白馬，?到成個王子咁，接我去皇宮住。」 鍾嘉欣冧到痹地笑著說。 「不過我入行咁耐都未有機會見過佢，一直都好想同佢講我好鍾意佢！」 坦白說，這刻的Linda似當年那群追車發癲小粉絲多過明星。 一直報稱自己未有理想對象，所以：「我就係等緊王子來接我，但係未有囉！」 正如我某位單身肥佬朋友，一知道黎明樂基兒正式宣布離婚後，即時於facebook上勇敢地宣布，要實行夢想多年的「追求樂基兒」大行動一樣，黎明剛剛回復單身，絕對是心儀者展開追求的大好良機。 嘉欣BB，你準備好迎接黎明王子未？ 唔係親眼比較，都唔發覺原來鍾嘉欣同吳尊真係激似樣，更有網友為兩人換臉。 鍾嘉欣展示事業線，即被高登友封為嘉欣ＢＢ。 愛情要來的時候，都要搵夠錢供樓至得0架！ 作為美容公司代言人，第二年繼續騷事業線之餘，仲出動43吋長腿。 今年初有報道指，鍾嘉欣與伍允龍親密唱Ｋ，更指兩人已地下情了五年。 撰文☆梁文威 攝影☆蔡豪 服裝☆Ted Baker、Nine、Deicy 化妝☆Kenny Cheung 髮型☆Green Cheung@Chin.G Hair 部分相片提供☆詩琳美容 設計☆黃梓欣 插圖: 林樂文
