想當年：曾經擁有的古董錄影帶 即將進入「死亡潮」

錄影帶，呢樣「古文物」好可能身邊好多90後都未見過，呢種被稱為VHS（全名「Vertical Helical Scan」嘅磁頭磁帶垂直掃描技術，自去年最後一條生產線正式停用後，已經唔會再有新出產，而且近日有專家估計，現存嘅錄影帶好可能會喺幾年內全部自行退化至不能再觀看！首先講下歷史，錄影帶自1980年代開始盛行，一直至2000年，及後出現嘅VCD、DVD格式正式令錄影帶退出舞台。根據美國動畫及電影工程主管Howard Lukk推斷，一般錄影帶，如果常用常睇，大概5年就會退化玩完，而就算唔常睇及保養得宜，最多保留約15年亦會退化，因此推斷2000年最後盛況時保留嘅一批帶，好可能呢幾期就「大限」將至！當然現存有唔少方法可以令VHS格式化，大家快手去做喇。如果閣下屬於VHS年代長大嘅人，相信一定曾經或目前都擁有過以下錄影帶。

電視電影

細個嗰陣未有碟睇又無得上網，遇上電視台播放自己鍾意嘅電影電視，或者喜歡嘅歌手唱歌或MTV，就會拎盒帶錄低，然後不定翻睇再翻睇。

成長片段

比較走喺潮流尖端嘅父母長輩，可能喺你細細個時已經用當年嘅手提攝錄機拍低你細細個嘅樣子；點同宜家嘅小朋友，一日拍幾十段，我地呢一代好難搵到細個嘅片段喇。

父母結婚

同樣地自己父母嗰一代未必人人負擔到攝錄機，不過都有可能喺佢哋結婚時請得起一位攝影師用VHS拍低，除咗可以睇到父母當年有幾恩愛，仲可以見到佢哋年輕時有幾靚仔靚女！

旅遊片段

旅遊唔係指剩外國呀，反而有好多係老香港嘅片段都係透過VHS留低，大家可能會發現屋企有啲VHS係影低咗舊日香港美好時光，有幸見過最原始嘅彌敦道、廣東道等！