庸材自擾：搵到錢但冇人同你分享，人生仲有咩意義？

香港地呢個社會好鬼奇怪，只有錢同樓，先至係評定一個人係咪成功嘅因素。

細細個已經被人灌輸要讀大學，將來畢業安份守己搵份好工，有車有樓，坐冷氣房點人做野，咁樣就係父母同外父外母眼中嘅成功。

朋友阿榮大學畢業之後就出嚟社會工作，剛畢業嘅佢人工唔高，但佢知道呢一個係年青人嘅必經階段，要喺職場上面更進一步，可以做嘅就係付出比別人更加多嘅努力，讀更多嘅書去提升自己嘅工作能力。

看似愚昧，但事實上響香港政府嘅宣傳推廣之下，持續進修先係升職加薪嘅不二法門。每星期阿榮嘅生活時間表就係朝9晚10，早上中午返工，夜晚進修讀書，有時候考試做功課嘅話，真係星期六日都冇乜休息時間，如果計埋起身刷牙搭車，咁阿榮就係朝7晚12，真真正正嘅鐵人廿八。

那年，阿榮28歲，升職做主任，月薪2萬，當時30年樓齡嘅500尺單位仲係250萬。

當時阿榮單身，而我當年已經結婚，我問阿榮既然事業開始有點起色，點解唔去識返個女朋友，之後結婚組織自己家庭，佢嘅答案係「拍拖浪費時間，情願花時間工作或者休息，男人只要有錢，根本就唔駛怕冇女朋友」，當時嘅我聽到冇太為意，畢竟每個人嘅價值觀唔同，作為朋友我冇資格講太多。

8年過去，憑住阿榮既努力，佢已經升職到做公司裡面嘅香港區主管，負責香港區所有業務，真正一人之下，萬人之上。已經35歲嘅佢，月薪10萬，住嘅係天賦海灣，出入有司機接送，好不風光。

中秋節，阿榮邀請我哋一班朋友去佢屋企聚會，有幾個朋友仲帶住佢哋嘅仔女出席，小朋友響屋裡面係咁跑，又喊又叫，雖然冇咗以前一齊集體賭錢飲酒嘅環節，但此時此刻，感覺卻更見溫馨。

幾個男人圍埋出水，阿榮有點感觸咁話：「阿材，你就好啦，有自己嘅家庭，阿嫂又就快生，我真係好羨慕你！」

我說：「邊夠你好，搵咁多錢，住靚屋揸靚車，我每個月嘅人工都只係夠駛，冇錢剩。」

「我而家的確係搵到錢，但冇人同我一齊分享，你明唔明？」阿榮望住屋裡面嘅小朋友續道：「我後生以為有錢就會有女人，但原來我有錢嘅時候，我先發現想搵一個鐘意自己而我又鐘意佢既人，其實好難！可以既話，我情願好似你咁，有老婆仔女，一家人生活咁人生可能仲開心。」

香港地有錢煩，冇錢又煩，大概人嘅一生，去到唔同階段，追求嘅野都會變得唔同。

年青既時候，我地想有車有樓，愛情我哋擺埋一邊；人到中年，我地開始想有自己嘅仔女同家庭，事業情願停滯，都想放多點時間陪家人。

我窮，但諗起呢一刻嘅我有健康既身體，有老婆有就快出生嘅女兒，錢對於而家嘅我嚟講，反而睇得唔太重。

做人，開心便好！