庸材自擾：希望用錢換黎幸福，定係因為幸福而唔在乎錢？

科技未發達嘅時候，我仲記得打電話上call台call貨車，仲慘過出街冇帶銀包問路人借錢，基本上打10次電話，9次都話冇車，另一次係同你講轉頭覆你，轉轉下自己已經轉咗返屋企。

早幾日幫朋友搬屋，凌晨12點嘅時候，我哋就用Apps call貨車，而好快貨車司機就打俾我哋。

「你好，係咪搵貨車？」

「係，我哋想由呢度送去邊度。」

「有人跟車有冇問題？」

「冇。」

「咁轉頭見。」

掛線後，我哋幾個男人有啲興奮，一直以黎，客貨車司機俾我嘅印象係非常粗豪，佢停車俾你上貨嘅時候，你唔可以太慢，因為佢會粗口問候你，又或者行經嘅地方唔可以有太多紅綠燈，如果唔係佢哋又會粗口橫飛。

所以聽到有人跟車仲包括埋搬運，對我哋幾個四肢孱弱嘅男人來講真係一個天大嘅喜訊。

貨車好快就到，而落車嘅司機係一個滿頭金髮，穿著黑色背心嘅年輕人。

我哋打咗一個突，佢瘦弱嘅身型應該仲孱過我哋，心底裡疑問緊佢係咪有力幫我哋搬運。

「想問下跟車嘅人係咪會幫我哋搬貨架？」朋友問。

「唔會，跟車嘅係我女朋友，不過我可以幫你哋搬貨。」司機說。

我們不感詫異，只快速的把所有貨物搬上貨車。

完成後，我們便登上貨車，坐車頭的是一個年輕染金髮，耳朵帶滿了耳環的女孩，說實話，感覺他們就是一對典型的MK男女。

貨車徐徐開出，女孩不停的按動電話，原先我只以為佢玩電話沒有太多為意，後來發現她正使用電話Apps替司機接Order。

當時已經係晚上12時，我聽到司機剛接咗一宗生意，係翌日嘅早上6點去機場，好快，又有第二個Order，就係完成我哋呢宗生意後，佢哋又要去沙田接客。

唔知點解，響嗰一刻我嘅感受好深仲有少少感觸。

眼前嘅佢哋，可能唔係有錢人，而貨車司機呢份工作亦未必足以讓佢哋大富大貴，但係我喺佢哋身上，我見到一種甜蜜嘅幸福。

女孩不停幫司機接生意，分擔司機接order嘅工作而讓司機可以專心揸車，可能有外人喺度，佢哋嘅對話唔太多，但我總見到女孩對住司機講嘢時所流露嘅眼神，係一種愛，亦係一種幸福。

我成日諗，而家嘅我幸福嗎？錢搵多咗，但相對地食飯開會見客應酬多咗，同太太相處嘅時間亦都少咗。

太太曾經講過，佢話我唔駛搵太多錢，夠用就得，因為搵得錢多，男人就會身痕，女人最重要嘅係希望個男人喺自己身邊。我則認為，男人要搵錢，係因為要養妻活兒，因為面子，唔想做朋友圈裡面最冇出色嘅一個。

希望用錢換黎幸福，定係因為幸福而唔在乎錢？

我諗，眼前嘅貨車司機同佢女朋友，俾咗一個好清晰嘅答案我。